Liaoning nung Khristantem senden ajungbena mita aru

Liaoning, May 04 (Agencies) : April 26, 2016 nü China anüdoklentip tsütsü anüdoklen aliba province nung Sannükertem ki ka nung sendena aliba mapang ka nung sorkar ketdangsertemi ajungbena mita aru.
Sannükertemi, China tesem balala nungi ki balala nung agiba Arogotem nungi “Unity in Christianity” sentong asoshi sannükertem nisung 40 shi adenshia liasü. Iba sentong ya Kunming, Yunnan nungi Sannüker Guo Pingxi-i ayongba liasü. Sentong tagidak nung security ketdangsertem den special police parnoki nisung 100 shi aser patrol gari aika iba ki telung jagi nungpoka ait.
Police tem jagi yangji aliba sannüker 3 idangjisa pua bener ao aser tanüngbaji ki telung nungji shibanga yur kija aser telok dang asüngdangya meso. Police-i mitba aser asüngdangyaba mapaji ghonda aika agi aser sorkar dang nungi temelaba kecha makai sendena agir ta sannükertem aitsü.
Sannüker Guo ji China anemer bendanger telok nung dena lir ta police temi aitsü, ta yangji dena aliba sannüker rongnung kati ashi.
Iba amai masüba tai tongloktsübaji temenünütsüka lir, ta pai shisem.
“Onoki parnoki ashibaji aitsü kechiba süra sannüker Guo ji China senso tajung ka lir. Pa kodaser China nunger anemer bendanger telok nung züngsem asütsütsü ? Sannüker Guo-i anir China nunger tamanger longjemtsü asoshi inyakbaji China Sorkari tsübur,” ta iba sannüker jagi ashi.
November 2014 nung Dazhou, Sichuan nunga tamangba tsütsü inyaka sayutsüngiba ajanga sorkar ketdangsertemi Guo dak kanga tenüng yok aser pua anir oa anogo 15 tashi tepuokdak ayu.
Tamangba nung lenir Sannüker, Guo Pingxi aser pa den külemi tamangba aser meimchir temetem atema inyaker sannükertem senden aliba mapang China nunger ketdangsertemi mapang aika nung ajungbena mita aoer, ta osang ajanga ashi.