Liberia Tir, Sirleaf ECOWAS mendenbula akümer

Dakar, June 06 (Agencies): Liberia Tir, Ellen Johnson Sirleaf-i Economic Community of West African States (ECOWAS) mendenbula akümtsü tenangzükba tanü, Hombar nü agiogo.

“ECOWAS nung züngsemba linüktem nung tensa azüoka linük ajunga kümzüka ayutsü nangzüker. Ano, ECOWAS nung züngsemba linük ajungai kiralongrabaren anema toaba mapang nungi tesashiba raratsü ayongzüker,” ta Sirleaf-i ECOWA mendenbula inyaktsü tenangzükba agidang metetdaktsü.

Senegal yimtiba, Dakar nung taoba hopta tatemlen amenba ECOWAS senden nung agiba election nung takok anguba sülen Sirleaf-i Senegal Tir, Macky Sall melenzüka ECOWAS mendenbula tan akümer lir.

“ECOWAS nung züngsemba linüktem indang rongsen jenjang tajungba kümdaktsütsü nangzüker,” ta shia, West Africa nung shishilembatsü tezüngzüktep balala takok ngua agitsü tayongzükba olen ka Sirleaf-i metetdaktsüogo.

“West Africa nung tentetba linüktem rong nung shishilembatsü tezüngzüktep agiba ajanga rongsenren jenjang tajungba akümba den külemi, linüktem rong nung tesendaktepa tajungba akümtsü,” ta Dakar nung tentetba West Africa Research Center nung Director, Ousmane Sene-ia metetdaktsüogo.