Libya-i lungjemshitsü tezüngzüktep agitsü ajungshir: UN

United Nations (UN)-i Libya’er yimtenren ken o bentettsü asoshi benokba teloktep sorkar tentettsü onük magizükertemi Libya kübok Benghazi yimti nung longkak aitba noksa ka yangi angur. (Benghazi, November 03)

Tripoli, November 03 (Agencies): Tang mangatettep adoka tongpang teraradak Libya sorkar aser sorkar anemer nati tanaben lungjemshitsü tezüngzüktep tatem küma agitsü atema United Nations (UN)-i telok anaprongla ajungshitsü tenzükogo.

Telok anaprongla den tongtepratepba sülen taoba mapang benokba Presidential Council nung züngsem 6 nungi 9 küma timba kümdaktsütsü asoshi UN-i tanü benoka liasü.

Iba luden nung Libya Ato Kilonser, deputy premier 5 aser senior minister 3 densemtsü asoshi onük benoka lir.

Ano, Libya nung tentetba parliament 2 nungi züngsemtemi mapang balala nung UN ketdangsertem den tanü Mongolbar nü ajurutepa UN-i benokba onüktemji angadangba osang jangjaogo.

Ita ishika tejaklen nungi tenzüka Libya sorkar anaprongla den jembitepa aruba sülen par telok anati tanaben lungjemshia teloktep sorkar tasen ka tentettsü asoshi UN-i maparen tenzüka lir.

Ajisüaka, taoba Libya lenisang, Moammar Gadhafi yimsüsütsü menden nungi tashiyim agi küm 4 tejaklen anentsüba sülen linük yimsüsütsü tashi benoktsü ken o nung ajemdaker adokba mangatettepbaren tanüa mebenteti aliba den külemi, mangatettep adokba telok ana tsüngda tongpanga mapang shia raraba osang bushiteta lir.

Sorkar anemba Libyan Dawn teloki tongpang nung amshitsü osettsüset amshia Tripoli yimtiba yaküm agia idakji par sorkar tentetba sülen alimai agizükba Libya sorkari-i Libya anüdoklen, Tobruk yimti nung parliament züngsemtem shima sorkar tang tenteta lir.

Ano külen, Libya nung sorkar ana tashi tenteta mangatettep kanga sashia adokba yong Islamic State (IS) kiralongrar teloki tensa tamajung nungi maongka tajung ngua lendong balala atalokdaktsütsü tenzükba den külemi, ozüng alema nisung shibelenertemia Libya ajanga Europe-i nisung meyirijang jenti anir aoba osang bushiteta lir.