Libya lenirtemi yimjung tezüngzüktep agitsü akok

Sikhrat, December 17 (Agencies): Libya nung tentetba sorkar ana nungi lenirtemi yimjung tezüngzüktep agia teloktep sorkar tasen ka tangatettep nung tentettsü asoshi terenemshiba agiba osang angazükogo.

Taoba Libya lenisang, Moammar Gadhafi yimsüsütsü menden nungi 2011 küm tashiyim agi atsüngdokba sülen par linük mangatettep adoka tongpang kanga sashia rarabaren anenja yimji yimjung lidaktsütsü nükjidong nung United Nations (UN)-i ayonger külen Tripoli aser Tobruk na nung parliament tentetba sorkar lenirtemi yimjung senden amen tenzüka lir.

Aji oda, alimai agizükba Tobruk sorkar aser Islamist teloki nungitba Tripoli sorkar nati Morocco nung iba yimjung tezüngzüktepji zülutepa agitsü akok.

Yimjung tezüngzüktep agir anogo 40 tsüngda nung teloktep sorkar tentettsü asoshi tan agitsü renemba tezüngzüktep nung telatetba yua lir.

Par telok ana tsüngda yimjung tezüngzüktep agitsü nükjidong nung Agula Saleh aser Nuri Abu Shamain nati aniba lenirtemi tan Mongolbar nü nungi tenzüka senden amen tenzüka lir saka par nüburtemi iba tezüngzüktepji agizüktsü asü magizüktsü iba osang tejangjabo tanü tashi bushiteta mali.

Libya yimjung tezüngzüktep nungitsü renemba olen ka UN, European Union (EU), African Union aser Arab League nungeria taoba Deobar nü metetdaktsüogo.