Libya nung Italy nunger 2 kümzük

Tripoli, March 4 (Agencies) : Yaküm July ita Islamic State jihadist-temi Libya nung Italy nunger ana apuba Hokolbar nü kümzükogo, ta ketdangser kati ashi.

Sepaitemi Tripoli anasa Islamic State jenoka aliba tesem kar mita aodang Italy nunger anaji kümzük, ta paisa ashi.

“Sabratha nung Daesh nisungtem kar lir ta osang angazükba sülen sepaitemi tesem ishika mita aodang Italy nunger ana kümzük” ta Sabratha mayor, Hussein al-Dawadi-i metetdaktsü.

“Tenaji tang Sabratha nung police station ka nung lir” ta paisa shisem.

Gino Pollicardo (55) aser Filippo Calcagno (65) nati sangdong ka nung, “Küna junga lir saka küna temang nung aser tekolok nung kanga anibelemogo. Küna Italy-i tekaratiba nung aotsüla” ta metetdaktsü.

July 2015 nung Tripoli nungi pilar aliba Mellitah tesem nung IS kiralongrartemi Italy construction company, Bonatti nung mapa inyaker nisung pezü apu.

IS-i apur nisung pezü nungi anabo Sabratha anasa IS aser local militia tsüngda katepdang kasetogo, ta Brihostibar nü Italy-i osang metetdaktsüogo.

Yaküm US-i Sabratha tezülen aliba IS training camp ka amakba sülen local militias aser IS jihadist tsüngda kanga rarayonga arur.

IS-i Sabratha yimti tiyongtsülen atsünga ait saka taoba hopta tu parnok yimti tezüleni meindokogo.