Libya nung ngutetba missile tem ya France indang

Paris, Chiteni/July 10 (Agencies): France mitkartemi Bodhbarnü ashiba agi, Libya nung tsükchirtem alidak Javeline missile ishika ngutetba ya France sorkari United States dang alizükba lir saka tamajung kümer raksaa indoktsüba liasü.
Osangbener dangi sangdong ka yokba nung Ministry of the Armed Forces ajanga ashiba agi, item missile ya kiralongrar den raratsü asoshi yoka aliba France mitkar unit tem kümzüka ayutsü mechi bener aoba lir.
“Teraksa aser tamajung injang bomb tem ya raksaa indoktsü asoshi depot ka nung khen atema bendena liasü aser item ya yangji aliba sepaitem nem magütsü,” ta ministry ajanga ashi.
Libya nung special forces tem yoka lir ta France-i yimjak nung metetdaktsüba ya 2016 küm sülen tang mezüngbuba lir. Saka sepai kwi yoka aliar mejangja.
Linük balalai agizüka aliba Government of National Accord (GNA) sülen anidakba Libyan sepaitemi taoba ita ashiba agi, linük yimtiba Tripoli south tsütsü Gharyan jila nung ozüng alemer mitkar lenir Khalifa Haftar sülen anidaker sepaitem apuba mapang US nung yangluba nok-o-nü tem ngutet.
Haftar-i pa indang headquarters amenoka aliba Benghazi yimti atsüngtettsü asoshi raraba mapang United Arab Emirates, France aser Egypt nungi mitkar teyari agütsüba nung metaloker lia aru.
GNA military odongtar Mohammed Qununu-i taoba mapang ashiba agi, pua aliba missile tem nung “Armed Forces of the United Arab Emirates” meyong ta zülua lir.
Saka taoba hopta UAE-i item nok-o-nü nung kibur maküm aser Abu Dhabi ya UN Security Council ajanga Libya nung tenokdangba agüja aliba ama bendanga agüja inyaker, ta shia liasü.
French armed forces minister indang adviser kati ashiba agi, par linüki sen $170000 dak tali indang Javelin missile pezü tashi US dang 2010 küm alizük.
Tamalen nungi France-i Haftar meyarir ta shia arur.
UN-i recognize süa aliba Fayez al-Sarraj sorkar atsüngdoktsü meranga April ita nungi Haftar-i Libya yimtiba amak tenzüka raraba mapang nisung 1,000 dak tali taküm samatsü, ta World Health Organization ajanga ashi.