Libya nung rong meküpoka sülen nisung 84 mangur

Rome, April 30 (Agencies) : Honibarnü Mediterranean Sea nung ‘migrants’ tem mena aliba rong ka meküpokba sülen nisung 84 mangur ta Italy nunger nisung kümzükba mapa inyakertemi ashiba osangkaket ajanga metetdaktsü.
Satellite phone ajanga ‘silent call’ ka aruba sülen Italy tzüküm nung inyakertemi merchant vessel ka dang Libya tzü nung pei lima toktsür bendang lima nung mapa inyaka alirtem mena aliba rong ka lendong nung aliba den tongteprateptsü osang agütsü, ta Xinhua osang ajanga ashi.
Tekümzükertemi iba rongnung alir parnok ‘migrants’ 26 tashi kümzükogo ajisüaka tzü nung parnok 70 shi samar alitsü südi, kechiba süra iba amala rong ka nung tajemba agi migrants 100 kabosa mener Italy-i arur, ta state TV Rai ajanga metetdaktsü.
Anogo ana tsüngda nung iba mesükba lendong pezü nung Italy nunger tzüküm nung inyakertem teyari dena tang tashi nung nisung 454 kümzüka lir.
Taoba hopta nungi tang tashi nung parnoki nisung 2,000 kümzüka lir.
Iba lendong nung asüba tasümang ana iba ama mita aoba mapang parnoki nguteta lir, ta TV osang ajangasa metetdaktsü.
Tang ya Africa aser Middle East linüktem nungi Mediterranean sea ajanga Italy nung   mapa tapu balala inyaktsü atema nisung aika arurba mapang ka lir.
January 2016 nungi tang tashi nung nisung 182,830 tashi linüki aitogo aser tarudang asür parnok nisung 1,261 jungogo, ta UNHCR-i sangdong ka ajanga ashi.