Tripoli, January 19 (Agencies): United Nations (UN)-i ayonger yimjung senden ishiben amenba sülen Libya nung tongpang rarabaren anena teloktep sorkar ka tentettsü renemba osang ka tanü Mongolbar nü metetdaktsüogo.
“Libya nung teloktep sorkar tentettsü renemogo aser Libya yimsüsür ajungai iba maparen takok ngudaktsütsü ajungshir,” ta UN-ia ajungshia metetdaktsüogo.
Tan tentettsü renemba teloktep sorkar ya Libya’er tongti shishilembar, Fayez al-Sarraj-i anitsü aser iba sorkar tasenba nung minister 32 tashi alitsü.
“Libya nung teloktep sorkar tentetta tensa jungdaktsütsü asoshi telemtetba tajung agiba atema Libya nüburtem aser Presidency Council, Formation of Government of National Accord na nem tenüngsang agütsür,” ta UN’er Libya envoy, Martin Kolbe-ia metetdaktsüogo.
Libya madak tashiyim agi yimsü asüsang, Moamer Kadhafi yimsüsütsü menden nungi tashiyim agi 2011 küm atsüngdokba sülen par linük sorkar 2 tashi tenteta tensa kanga mejungi aru.
UN-i kanga meranga inyakba sülen alimai agizükba Libya sorkar parliament yimsüsür 188 nungi 80-i aser Tripoli nung tentetba General National Congress yimsüsür 136 nungi 50-i par mangatettepbaren agiena teloktep sorkar tentettsü tenzüngzüktep yaküm December ita 17 nü zülutepa agia liasü.
You must be logged in to post a comment Login