Libya okadaki Gaddafi jabaso, Saif nem tasüba temerenshi agütsür

Tripoli, July 28 (Agencies): Libya nung tentetba tematiba okadaki taoba mapang nung Libya madak tashiyim agi yimsü asüsang, Mummar Gaddafi jabaso, Saif al-Islam nem tasüba temerenshi tanü Mongolbar nü agütsüogo.
Gaddafi yimli jireptsüsa taoba mapang, 2011 nung Libya nüburtemi longkak aitdang kasaji ajemrptsü merangba aser tongpang raradang ozüng alema inyakba ken o nung aitsüba sülen okadaki Saif nem tasüba temerenshiji agütsü.
“Kasa ken o nung aitsüba sülen Saif den külemi, taoba itangitsü telok lenisang, Abdullah al-Senussi aser taoba Libya Ato Kilonser, Baghdadi al-Mahmoudi na densema Gaddafi lenisüba kübok yimsüsütsü menden abener 8 tashi firing squad agi kaseta merenshitsü o bendang agütsüogo,” ta Tripoli state prosecutor office nung chief investigator, Sadiq al-Sur-i osang jangjashitsü.
Paisa ashiba agi, Gaddafi kübok tenzükba ketdangser 8 nem taküm tepiyong tepuokdak puoktsü aser ketdangser 7 nem küm 12 tashi tepuokdak puoka ayutsü temerenshi agütsüogo.
Kasa ken o nung aibelena maliba kuli tejangja bushitetba sülen aibelena inyak ta temulung melemi bilema apu nisung 4 anema benokba ken o agiena liasü.
Tanü o bendang agütsüba sentong nung Saif kijai shilem magiteti liasü kechiyong pa ya taoba küm 4 tejaklen nungi tenzüka Zintan region nung tentetba sorkar anemer telok kati pua yua lir.
Taoba mapang, April, 2014 nungi tenzüka ken o angadangba sülen tanü agütsüba o bendangji tanaben reprangshitsü lenmang lapokja lir.
Ajisüaka, Libya nung tentetba okadaki ozüngi melaba ama ken o junga mangadangi aibelena alir ta bilemba nisungtem merenshiba olen ka International Criminal Court (ICC)-i tanü metetdaktsüogo.