Libya sorkar anati teloktep sorkar tentettsü tezüngzüktep agiogo

Skhirat, December 18 (Agencies): Libya nung tentetba sorkar anati par tongpang rarabaren anena külemi lokteper teloktep sorkar tasenba tentettsü tezüngzüktep ka yashi, Brehostibar nü agiogo.
United Nations (UN)-i ayonger tan Moongolbar nü nungi tenzüka senden amenba sülen Tripoli nung tentetba alimai agizükba General National Congress (GNC) sorkar aser Islamist teloki nungita Tobruk nung tentetba sorkar nati tan yimjung tezüngzüktepji Morocco kübok Skhirat nung agir lir.
Taoba mapang, 2011 nung tashiyim agi yimsü asüsang, Moamer Kadhafi yimsüsütsü menden nungi tashiyim agi atsüngdokba sülen Libya indang yimsüsütsü tashi abentsü rara adoka taoba küm 1 tejaklen nungi tenzüka, Libya tensa kanga mejungi kümogo.
Nuri Abu Shamain-i aniba Tobruk yimsüsür aser Aguila Saleh-i aniba Tripoli yimsüsürtemi tan tezüngzüktepji zülutepa agiba sülen Libya’er tongti shishilembar, Fayez el-Sarraj Ato Kilonser süa tetsür yimsüsür ana densema, yimsüsür 7 shimteta teloktep sorkar tasenbaji tentettsü renemogo.
Libya nung legislative assembly election agiba jakdang, taruba küm 2 tashi Libya linük anidaktsütsü nükjidong nung tentettsü renemba teloktep sorkar nung Presidential council malitsü latetogo.
Mangatettep ken o adokba Libya sorkar anati tan yimjung tezüngzüktep agia teloktep sorkar tasenba tentettsü renemaka, Libya yimsüsür karibo iba tezüngzüktepji magizüki aliba osang jangjaogo.
“Ozü Libya nung sorkar ana tashi tenteta lir. Ajisüaka, tan tezüngzüktep agiba ajanga sorkar tasembuba tentettsü renemer lir aser iba jagi ozü linük yimtenren ken o tali benjatsütsü akok,” ta GNC züngsem, Mahmoud Abdelaziz-i mepelaba olen ka metetdaktsü.
Ano külen, North Atlantic Treaty Organization (NATO) aser West-i tan Libya-i agiba yimjung tezüngzüktep pela agizükba olen ka tanü Hokolbar nü metetdaktsüogo.
“Tan tezüngzüktep agiba ya Libya linük jenjang tajungba akümtsü asoshi tongti mera agir lir,” ta shia, UN ambassador, Martin Kobler-ia tan tezüngzüktep agiba atema pelaba olen ka sangoktsü.
“Tan tentettsü renemba teloktep sorkar tasenbai nübur temeten, rongsenren aser linük kümzüka alitsüren reprangshiba ajanga Libya ajunga nung tensa tajungba küma terenlok alitsü,” ta UN Secretary General, Ban Ki-moon aser US State Secretary, John Kerry natia metetdaktsüogo.