Libya tzüyimkümlen tasümang 4 angu; migrant nisung 700 shi kümzük

Rome, February 24 (Agencies): Libya tzüyimkülem tasümang 4 tashi anguba den külemi, pei linük toktsür Europe nung jenoka alitsü asoshi apusor migrant nisung 700 shi kümzüka anitetba osang ka Italy’er navy aser coastguard nati tanü, Bodbar nü metetdaktsüogo.
Italy’er tzüyim sepaitemi par Cigala Fulgosi rong amshia, migrant nisung 304 shi rong 3 nungi kümzüka tzüyimküm tonga anitetba osang jangjaogo.
Tan nisung asüba lendongji kechi timtem ajanga atalok iba osang tang tashi nung mejangteti lir saka taoba mapanga rong nung tajemtsü tzü peria mangoba aser mejeptepa alidak totzü süknem senokba ajanga Libya ajangdanga tetsüng agi jajaba sülen tzüyim ajangdanga Europe nung jenoktsü meranger migrant nisung jenti asüba osang bushiteta lir.
Italy’er tzüyim sepaitemisa par Bettica rong amshia rong 2 nungi migrant nisung 219 aser Scirocco rong amshia rubber rong ka nungi migrant nisung 105 shi kümzüka anitetba osanga Italy ketdangsertemi metetdaktsüogo.
Taküm, 2016 küm tenzüker tanü tashi nung migrant nisung 6,736 shi Libya ajangdanga Italy nung tetsüng ajemokba osang bushiteta lir.
Yaküm, 2015 küma migrant nisung 7,257 shi Libya ajangdanga par Italy atongba osang ka Italy Interior Ministry-i metetdaktsü.
Taoba January ita nungi tenzüka tanü tashi nung migrant nisung 110,000 dak temai Europe, talisa Greece tonga aoba aser nisung 410 shi tzüyim nung asüba mesüra samaba osang bushiteta lir ta International Organization for Migrants (IOM)-ia tanü metetdaktsüogo.