Geneva, February 25 (Agencies): Libya yimsüsürtemi teloktep sorkar tasenba nungitsü asoshi agiba telemetetba pela agizükba olen ka United Nations (UN)-i metetdaktsüogo.
Alimai agizükba Tobruk parliament yimsüsür 196 rong nungi parnok 100 shi Tripoli nung tentetba telok den aroki lungjemer Libya nung teloktep sorkar tasen tentettsü onük agizükba osang metetdaktsüogo.
“Libya yimsüsürtemi tan tenangzükba agiba ajanga Libya nübur aser yimsüsürtemi teloktep sorkar tenteta par linük nung tensa tajungba kümdaktsütsü alizüng ayuba kuli angur,” ta Libya-i yokba UN envoy, Martin Kobler-i metetdaktsü.
“Tan nangzüktepba ama, Libya yimsüsürtemi teloktep sorkar tekaratiba mapang nung tentettsüsa nungdakba maparen inyak tenzüktsü ajungshir,” ta pai shisem.
Libya nung mangatettep adokba den külemi, sorkara ana tashi tenteta tensa kanga mejungi alibaren tajungba kümdakja par linük nung yimji yimjung tia lidaktsütsü nükjidong nung UN-i mangatettep adoka raraba telok ana tsüngda yimjung tezüngzüktep agia parnoki külemi lungjemer teloktep sorkar tentettsü ajungshia aruba osang bushiteta lir.
You must be logged in to post a comment Login