LIC-i Railways nem sen crore 2,000 cheque amoktsüogo

New Delhi, October 27 (Agencies): Centre indang Life Insurance Corporation of India (LIC)-i railway project tem nung amshitsü atema mezüng telemdang sen crore 2,000 indang cheque ka Indian Railway Finance Corporation (IRFC) nem amoktsüogo, ta ketdangsertemi metetdaktsü.

Railway budget benoker hopta ana tsüngda nung LIC-i küm railways nem sen crore lakh 1.5 aputsütsü asoshi railways aser LIC na tsüngda züngzüktepogo. Iba ya tesüiba mapang dang nungi kanga agi timtiba asütsü.

Parnoki tan aputsüba sen ya ’30 bps’ nung aputsür aser küm pongu sülen küm trok nungi ter tashi interest ang agütsütsü. Küm 11 nungi küm 30 tashi nung iba sentsüh ya installment yimya nung aomatsü.

Iba cheque agütsüba mapang Railways Minister Suresh Prabhu-i ashiba agi, India Railways nung terenlok balala atema tenzükba project tem atema nüngdakba senotsü angutsü kanga temela masü.

“Sen metsükra mapa ka danga takok ngua meinyaktettsü,” ta pai ashi.

Prabhu-i, sen minok asübo Railway ya kanga mejungi atemzüka lur lila, ta shisem

“LIC-i aputsüba senji küm 30 nung aomatsüla aser ibaji railway project inyakyim den liromedema lir,” ta paisa ashi.

Pai, iba sen ya project tasen atema dang masü saka tang teinyakdak aliba project tem nunga amshitsü aser ibaji ajanga Railways inyakyim nung tajangzük bener arutsü, ta ashi.