Jerusalem, May 25 (Agencies): Israel Ato Kilonser, Benjamin Netanyahu-i Yisrael Beitenu yimtenren telok lenisang, Avigdor Lieberman Israel Defense Minister tasenba inyaktsü asoshi shimogo.
Israel nung tentetba teloktep sorkar tali tashi itshitsü nükjidong nung Netanyahu-i Lieberman par sorkar nung anioksemer lir.
Yisrael Beitenu telok den lokteptsü tezüngzüktepji Netanyahu aser Lieberman nati Israel parliament, Knesset nung tanü, Bodbar nü zülutepa agia liasü.
“Lieberman aser pai aniba telok teloktep sorkar nung pelashishia anioker. Taoba mapanga Lieberman den aroki lungjemer Israel jenjang tajungba kümdaktsütsü asoshi mapatong jenti takok ngua inyakogo,” ta Netanyahu-i tanü metetdaktsü.
Netanyahu-i aniba teloktep teloki menden 120 densemba Knesset nung menden 61 dang ngua liasü aser iba yongji, par teloktep telok jenjang tali tashi itshitsütsü nükjidong nung Zionist Union yimtenren telok lenisang, Yitzhak Herzog den lokteptsü asoshi jembitepa liasü.
Ajisüaka, Netanyahu-i tatem nung Lieberman’er telok den lokteper lir aser tan loktepba ajanga Netanyahu-i aniba teloktep teloki menden 66 tashi ngua, Knesset menden timba ajangzüker lir.
Ajisüaka, Lieberman den loktepba ajanga Israel aser Palestine na tsüngda tensa tamajungba küma tongpanga toaba mapang nungi tesashiba raratsü tenzüktsü ta Herzog-i metetdaktsüogo.
Ano külen, Gaza Strip nung tentetba Palestine telungpur telok, Hamas lenirtem tepsettsü asoshi taoba mapang amokmerensang, Lieberman defense minister shimba ajanga alimai tebilemtsü khuret benokba osanga jangjaogo.
Tan loktepba sülen Lieberman-i Moshe Ya’alon melenzüka, Israel Defense Minister tasenba akümer lir.
“Onoki tongpang raratsü mebushir saka tongpang raratsüsa küma, ozü teloki Israel den maneni tongpang raratsü renema lir,” ta taoba Hamas interior minister, Fathi Hammad-ia Lieberman Israel Defense Minister tasenba akümba osang angazükba sülen metetdaktsüogo.
You must be logged in to post a comment Login