Lieutenant Colonel kati nisung tepsetba nangzük

Chiteni/July 30, 2018 (Agencies): India Army, Intelligence Corps, 3rd Unit nung Lieutenant Colonel kati Manipur High Court nung affidavit ka file süogo. Iba affidavit nung pai army telok kati Manipur nung tai maketba nisungtem tepsetba aser parnok ket nungi rakzükraktemba nangzükogo.
Indian Express sangdong ka ajanga ashiba agi, iba affidavit nung shia aliba agi, Lieutenant Colonel Nanda aser Major Rathore nati anir sepaitemi Singh ya Imphal nung pa indang quarter nungi Chiteni/July 1 anepdang anir ao aser anogo pongu lir okadak ajanga pa chioktsü asoshi tetuyuba magütsü tashi pa par ki alema meyoki puoka yur liasü. Army sangdong ka ajanga ashiba agi, iba taitsüba ya tamendak dak maka aser officer ya tangaleni posting yok, ta ashi.
Kasa osang ajanga ashiba agi, Singh-i parnoki aibelenba osang agütsüba sülen ketdangser kari pa anema aru.
Affidavit nung shia aliba agi, Rongjui/September 9, 2016 nü Singh-i Manipur nungi tebur chanutem Dimapur nungi pur Rangapahar Cantonment anasa taila khatepba ken o nung densemdakja khaset ta tashishiba ka zülu. Ajisüaka tekolak nung aliba ketdangser temi aibelena alirtem anema tapet temerenshi agütsütsü, ta shia pa nongshiba sülen pai iba shidi ya agin, ta Affidavit nung shia lir.
Maneni Affidavit nung yamai züluja lir: “Tanga tatalokba ka nung ST Dominic College nung azünger Satish aser par medemertem kasa telok yagi Shillong nungi Tsükali/February 5, 2010 nü apu aser parnok ya arem nung tepset. Asür tsürapurtemi Tsükali/February 23 nü parnok samaba osang Manipur Director General of Police nem agütsü, saka tang tashi nung kecha inyaka mali.”
Singh indang affidavit nungsa shia aliba agi, Metsüremi/March 10, 2010 nü Manipur nungi lanur asem; Phijam Naobi, RK Ronel, aser Th. Prem nunger Dimapur nung taa agütsür lia aliba ki ka nungi 3 Corps Intelligence Unit puri apu aser unit indang Mess tesülen tepset.
Lt. Col.’s Dharmendra kinungtsü-i ashiba agi, “Kü kinungbo atema Army ji tamangba yimsü lir aser künapronglai iba lokti kanga akhümtsübur aser iba inyakyim anema nokdaktsü ta kodanga bilema maliasü. Show cause notice kecha magütsüi kü kinungbo kechiba apu ta ni ketdangsertem dang asüngdangner.”