Light bills Aadhaar den sendakteptsü sorkar sentong lir

New Delhi, May 04 (Agencies): Bodhbarnü Power Minister tem Conference nung power Ministry-i state tem dang light bill saruba maparen ya digital akumtsü atema ajungshiogo.
State shia pei sasep nung Electricity maparen ya achaayanger, anungji Centre-i iba dak sendakba nung tebilemba onüktem ang benoktsü akok.
Union power ministry aser state ajunga nungi minister tem senden nung shilem agirtemi ashiba agi, light bill saruba maparen nung digital benokba ajanga power distribution company temi takoksa nguyaa aliba anentsü.
Ketdangser kati ashiba agi, “Piyush Goyal-i, kechiba state temi electricity bills ji Aadhaar den mesendakteper ta asüngdangogo. Paisa, discoms ajanga bill tem bank accounts den sendakteper, koba ajanga bill period tembangba mapang nung senji ‘deduct’ asür. Iba ya ajanga sen magütsüba ajanga saru nung takoksa anguba koktettsü.”
Ketdangser kati ashiba agi, “Aadhaar ji electricity bills den sendaktepba ajanga ochishi alitsü aser digital maparen ajungkettsütsü ta Centre-i bilemer. Iba ya ajangasa discoms maparen tajungba akumtsü.”
Income tax returns atema sorkari Aadhaar compulsory kümtsüogo.
Mezüngbo Aadhaar ya sorkar scheme balala aser subsidies atema tenzüka liasü, ajisüaka tangbo service balala aika atema Aadhar ya compulsory kümogo.
Cooking gas subsidy atema Aadhaar sendaktepba ya alima nung direct benefit transfer (DBT) programme tulutiba kümogo.
Taoba sorkari cooking gas nung DBT tenzüka liasü, saka state kari ibaji anema nokdakba sülen iba scheme anena liasü.
Ano tan sorkaria iba scheme tenzükshi.
Tamasabo DBT ya bank accounts den sendaktep saka Lok Sabha nung Aadhaar legislation agizükba sülen subsidy agitsü atema cooking gas consumer number den Aadhaar sendaktepa liasü.
State tem aser UTs nungi Power, Renewable Energy aser Mines Minister tem senden nungsa cyber security aser digital payments atema jembia liasü.