Likya SHG-i yakbang nung inyakertem ajungmeso

April 12 nü LIKYA SHG züngsemtem, Kailash Jain aser East Police Station Dimapur nung police personnel tem tangokba noksa nung angur

Dimapur, Rongchii/April 12 (TYO): COVID 19 tashidak den pei taküm bendanga agüja yakbang nung inyakertem shi, tanüla aser sarasadem ajanga nongita yaria Easter anogo Likya Self Help Group-i (tetsür 7) Chumukedima nungi Dillai gate aser New Field gate tashi nung policemen/traffic personnel tem nem refreshment agüja liasü.
Easter anogo tanüla mesamadaktsütsü asoshi parnoki chiyongtsü agütsüba mapang Easter ken tem tema liasü. Kasa mapang nung SHG züngsemtemisa East Police Station, Traffic Police office, West Police Station aser media houses tem semdanga parnok ajungmesogo.
Maneni Likya Self Help Group züngsemtemi, Kailash Jain, Pappu Sharma aser Star bakery-i Likya SHG pur inyakyim pusemba atema aser parnok den teka amteper inyakba atema parnok nem tenügsang agütsü.