Lille-i tang mezüngbuba Champions Trophy kokogo

Luroi/August 2, 2021 (Agencies): Deobarnü Champions Trophy final asaya nung Portugal nunger midfielder Xeka-i goal ka idakja French champion Lille-i, Cup winner Paris Saint-Germain goal 1-0 agi kokogo.

Deobarnü takok ya Lille coach tasenba Jocelyn Gourvennec atema mezüngbuba takok marok asütsü, koba pai Christophe Galtier indang mapa melenzükba sülen mezüngbuba asaya nung ajangzüktetogo.

Galtier lenisüba nung Lille-i taoba küm French league akok saka pai club toktsür Nice nung oa aden. Pai club toktsüba sülen Gourvennec-i off season nung coach mapa agizük aser pa lenisüba nung club-i mezüngbuba asaya nung iba takok marnok koktetogo.

Final nung asaya mezüngbuba shilem tembangtsü lia Xeka-i penalty area kümbang nungi ball kanga junga metsüloktsü aser goalkeeper Keylor Navas-i pai metsüba ball menokdangteti idaktsü.

Taoba season nung Lille-i goal ka danga mechi PSG akoba den draw süogo aser Deobarnü final asaya nunga France backup goalkeeper Mike Maignan AC Milan dang yoker liaka goal ka danga machi.

French league hokolbarnü nungi tenzüktsü. PSG pur Troyes den Honibarnü asayatsü aser Lille pur Deobarnü Metz den asayatsü.