Limapur matsüngdang Naga limaji Khristan lima ta kuli mesütet

~ L. Kika Pongener.

Naga lima ya Khristan noklang shilem nung 90 % aliba lima ka ta ashitsü akok. Naga limaji Khrista asoshi ta alima matsüngdang yimyim ayimoktsüba lima ka lir. Missionary merijang ter yoktsü nangzükba lima ka lir. Naga limaji yi kheni mayoktsü aser majemtsü (Dry State) ta yimyim ayimoktsüba lima ka lir. Naga limaji Assembly menden – 60 prongla nung Chief Minister-i anir Minister & MLA Khristan temeja mener yimsu asüba lima ka lir. Anungji Naga lima nung mongdang-mongji aser benjong-bentsü balala amungdang alima tesem balala nungi iba mongdang aser benjong nung adentsü arurtem limapur mamangertem matsüngdang Yisu Khrista indang kuli asütsü aser Naga limaji Khristan lima ka ta kuli asütsü mapang tajungtibaji iba mapangji asütsü. Alima dangi missionary noklangsa merijangsa aika meyok-aka bendanger asen lima reprangi arurtem (Foreign Tourists) -tem dang Yisu Khrista indang kuli asütsü aser Naga limaji Khristan lima ka ta kuli asütsü mapang tajungtibaji iba mapangji asütsü. Aji oda, Naga lima nung sorkar sentong nungi shir loktiliba balala nung kechi sentong atongdir atong-aka, kechi maparen-sa inyakdir inyak-aka, ajungaji Khristan jakla yimya (Christian Spirit) nung amendaker dang sentong atongtsüla aser inyaktsüla. Akokba tashi sorkar nungi shir loktiliba balala nung kechi sentong agidir agi-aka, deobar anogo-bosa paitoker dang sentong yanglu nungang kanga tajungba asütsü. Aji oda, Nagalang Public Service Commission (NPSC) -i ketdangsua agiba tatidang (Examination) asüyongjia, akokba tashi agi deobar anogo nungbosa magi nungang kanga agi tajungba asütsü.
Kechiyung yimsusur ajunga Khristan tamanger tajungtemi yimsu asüba lima ka nung, deobar anogoji kanga dang metsünga-reta, anembonga, asüngteta, meshiteta amungtsü melena sorkar sentong balala aser loktiliba sentong tapu balala ayongzüka amongtsübaji alima matsüngdang maaksu tulu ta züngshitsüla, aser Tsüngrem tsüngdanga sentsüh tulu aser khuret tulu ta atendena tsübuseta bilemtsüla. Taoba 2019 küm ‘Hornbill’ benjong anogo December 1-10 tashi nung-to kanga tia kaa deobar ana tashi ajurushia ata, anungji iba deobar anogo ana nungji alima tesem balala nungi benjong nung adentsü aser alima reprangi arur ‘Tourists’ – tem dang Naga limaji Khristan lima ka ta kuli asütsü mapang tajung ka liasü. Ajisuaka, kanga dang tesasatsü-ka, asen Naga nunger sorkar ketdangsertemi iba deobar anogo ana nungji aki mapang amai dang kecha temelenshi mekai benjong dak sentakba sentong tapu balala agiyunga aoba ngua tamanger tajung aika mulongjang nung kukua kongshir alitsü sudi. Aji oda, December 1st anogoji deobar ajurur asünungji 2nd to 11th December tashi anogo melenshir amongtsü ta alima matsüngdang yimyim ayimoktsü asübo limapurtem matsüngdang Naga limaji Khristan lima ka ta kuli asüba tatishitsü tajung ka sula. Aji oda, yamajisa masüyongjia, deobar anogo nungbo benjong sentong tarensenji ‘Devotional’ sentep agiba mapang 10:00 – 11:00 A.M. ghonda ka tashiji danga tanga sentong kecha magi-i azüngteta yutsü asübo, ibajagi limapur mamangertem matsüngdang Naga limaji Khristan lima ka ta kuli asüba tatishitsü tajung ka sula. Ano iba dakji alaka, Naga limaji (Dry State) ta alima matsüngdang yimyim ayimokja yur, Hornbill benjong nung Hotel ajunga nung amai yi taluposa ayoker, kima-yimdong ajaklen yi bottle mereptoka lir, ammang arura kima-yimdong ajaklen yi agi meseper asateper, rarateper, japojarir, nüktapangdar…!!! Iba ama lima dangji kodaser Khristan lima ka ta ashitsü…??? Ano aji dang masü, Hornbill benjong ya rongsen rakzükraktemsu mapang tajung ka amai kümdaktsür…Taxi para, chi chiyungba aser sungo ajemba, osettsüset kechisarena ajak nung jenjang kanga tali-tapong tur meshiba agi, Tourists-temi “Kanga junger saka jenjang kanga sakrara” ta jembiba otsü angazüker.
Aji oda, tangar bendanger anuolen alir taka-taiter rongsen kongang mintok yangko sunga bener alima repranga jangratema senzütsüba jangrartem-ia sunga jenjang kanga tasak-a ta shira, Assam-India lima nung alir tzümar tokuro nisungtem-ibo kechi ashitsü…??? Atangji 2019 küm Hornbill benjong mapangji limapur mamangertem dang Naga limaji Khristan lima ka ta kuli asütsü mapang tajung ka liasü. Alima talangi rongsen aser nubu indoka sayutsüng-ia moo-aka asen atepzüng nung mener missionary mapa inyaktsü mapang tajung ka liasü. Atangji Devotional sentep mapang ghonda ka azünga aliba mapang nungji alima tesem balala nungi arur limapur mamangertem-jia tanga tesem kar nung mapang indoka atatsü, mesura ashiko karibo asen den kulem Tenla kidang asenok tamangba aser tekulem yimya reprangdanga dener lila. Yisu alima nung alidang, pa apoba aonung-to temaba Putir kilitsür tetsür chanu ka matsüngdang Peter-i asemben tashi Yisu Khrista menangzüktet. Peter-i tanga mapang ka nung Yisu dang, tangar nutsüng ajaki na toktsür oaka ni na kodanga metoktsütsü ta azüngashia jembia lir, saka item ajak-to amaadoker Peter-i tetsür chanu ka matsüngdang Yisu Khrista menangzüktet. Iba kasaji taoba 2019 küm asen Naga nunger yimsusur aser sorkar tenzükertemi anir nutsüng-nubur ajaki ‘Hornbill’ benjong mapang nung limapur mamangertem matsüngdang, Naga limaji Khristan lima ka ta kuli mesayutet. Surangpangla, asen Naga nunger Khristan tamangertem tamang jenjang kong lir…???