Limboo-Tamang kin atema menden mekazüka toktsütsü:CM

Gangtok, Rongchii 13 (Agencies): CM Pawan Chamling-i West Sikkim semdanga senzüba mezüngbuba shilem tanü tembangogo. Iba sentong tembangba den külemi pai Limboo-Tamang kin atema Assembly nung menden mekazüka toktsütsüba aser Assembly menden 32 aliba nungi 40-i ajungkettsüba sangdonga liasü.
“Limboo-Tamang kin atema menden mekazüka toktsütsüba yakta ataloktsü. Sikkim Legislative Assembly nung tang menden 32 aliba 40-i ajungkettsü,” ta Chief Minister-i Rinchenpong bazaar, West Sikkim nung ashi.
Iba olen ya pai West Sikkim sema senzüba mezüngbuba seilem tembangba sülen Rinchenpong constituency nung aliba nüburtem den jembidang ashi.
“Limboo-Tamang kin atema ST jenjang ya SDF party puri benoka agizük aser Assembly nung Limboo-Tamang menden ya dena SDF party aser sorkari mekazüktsütsü,” ta CM-i ashi.
Yashi tashi Sikkim sema senzüba mapang nung CM-i ashiba agi, Sikkim nung Limboo aser Tamang kin atema assembly nung menden mekazüka toktsütsüba inyakyim ya Centre-i monudaktsüba ajanga lir. Limboo-Tamang kin atema menden mekazüka toktsütsüba ya Centre inyakyim lir aser state sorakribo takhangba dang agütsütettsü, ta paisa ashi. Sikkim nungertem meshimetsürba masü saka lisopur ka ama temedem meshirba dang, ta shia pai Centre dang mepelaba lemsatepa liasü.
Limboo aser Tamang kin ya Sikkim nung tribal kin ama 2003 küm agizük saka Sikkim Legislative Assembly nung ST atema menden mekazükja maliba ajanga parnok nem menden balaka mekazüka meyutsüteti lir. Tang tashi nung Limboo aser Tamang kin atema assembly nung menden magütsüi election asem tashi agiogo.
Menden mekazüka toktsütsüba ken o ya taruba küm Rongchii (April) nung election matong tsüngda benteta ayutsüba atema tanga aritepa inyakdar.
State sorkari Centre dang Assembly menden 32 aliba nungi 40-i atsülangtsüba atema benokdanga lir aser iba nung Limboo aser Tamang kin atema menden 5 mekazüka toktsütsü.