Lin Dan-i All England title 6 ben buba benogo

Birmingham, March 13 (Agencies) : China nunger badminton asayar Lin Dan-i ‘All England badminton championships’ asaymung nung tan agi trokben buba takok nguogo. Pai Deobar nü par team nungi Tian Houwei madak mela mela takok angu.
Ponguben tashi world champion aser anaben Olympic champion Lin-i, iba asayamung tatembangba asaya nung minute 45 tsüngda 21-9, 21-10 nguteta iba takok marok angu, ta Xinhua news agencies ajanga metetdaktsü.
Tian ya Lin dang nungi arishi küm 9 agi tanubo lir.
Lin Dan-i iba marok ya 2004, 2006, 2007, 2009 aser 2012 kümtem nungsa bena liasü, ibaji ajanga küm 40 tsüngda nung iba asayamung nung takok timba ngua asayar kümogo.
“Ni kangasa pelar. Ni iba asayamung nung 2002 küm mezüngsüa asayaba dena tang agi kasa asayamung nung 12 ben shilem agir asütsü. Ni shilem agiba mapang Tokuben tashi final tongteta asayaogo aser tan agi trok ben buba takok angur. Ya mapa temelabo masü. Asaya shia nü tajungtiba agi asayatsü nüngdaker,” ta arishi küm 32 tain, Lin-i ashi.