Lin Dan-i Malaysian Open final kokogo

Kuching, April 9 (Agencies) : Tanü Deobarnü Petra Jaya nung aliba Perpaduan Stadium nung Malaysia Open final asaya nung China nungi Lin Dan-i 21-19, 21-14 agi Lee Chong Wei madak takok anguba ajanga pa nem par linük nung takok marok 12buba angutsü aliba magütsü sot.
Lin Dan-i Malaysia nunger badminton asayar mongin Chong Wei den kangasa junga asayatet aser pai iba final asayaji minute 55 tsüngda nung akok.
Iba takok ya Lin Dan asoshi Malaysia nung mezüng takok marok lir. Pai 2005, 2006 aser 2015 kümtem nunga final tashi tua asaya saka takok marok mongutet.
Malaysia Open nung takok anguba ajanga Lin Dan ket nung alima nung tongtibang badminton asayamung ajak indang marok lir.
Chong Wei den asaya 36 asayaba nung Lin Dan-i tan agi takok 25 ben angur.
Punguben tashi world champion, Lin Dan-i Malayasia nung takok marok mongudang lir tan iba takok angudang kangasa pela.
“Par linük nung Chong Wei koka iba marok abenba ya jangratemtsüka lir,” ta Lin Dan-i asaya temer külen ashi.
“Ni Chong Wei den asaydang teti kü dak aliba sempet tajungtiba adoker…aser tanüa ni asoshi anogo tajung ka liasü,” ta pai ashi.
Chong Wei-i iba tamakok tajunglen nungi agi.
Mezüng game ji kanga tongtibang liasü. Ni Lin dang nungi point timba süla saka ni aibelen kar inyak,” ta Chong Wei-i ashi.
“Lin Dan-i tanabuba game kanga temulung lema asaya saka nibo junga masayatet. Makokbaji tesasatsüka saka ni iba tamakok agizüktetter,” ta Wuhan nung asayatsü aliba Asian Championships nung shilem agitsü alisang Chong Wei-i ashi.