Lindsay Lohan dak tetsür kati tejak nung tsüngoktsü

Mongputeni/October 2, 2018 (Agencies): Rogonü aonung Lindsay Lohan-i ki makaba kibong ka aitsüba sülen tetsür kati la dak tejak nung tsüngoktsü.
Rogonü aonung Lohan-i tatalokba ajak ya la indang account ajanga Instagram LIVE ama lemsatepa liasü.
Arishi küm 32 tain actress-i mezüng la club nung party amungba video ka lemsatep. TMZ sangdong ka ajanga ashiba agi, la Moscow nung liasü. Iba sülen tanabuba video nung Lohan gari ka nung mener aoba angur aser la aoba mapang lenmang tezülen kibong ka sü abener anisüngzüka aliba angur, koba lai video nung Syria nunger refugee ta shia lir.
“Ni nenok ajak dang Syria nunger refugee kibong ka sayuner, ni parnok ya tang ajuru aser parnok atema kanga shisabulua bilemer. Parnoki teyari nüngdaker,” ta lai video nung shia lir.
Iba sülen Lohan-i parnok den oa jembi aser hotel takdang ka agütsüba den tanurtem la den tv mesera computer nung movie repranga kazütsüba shidang.
Ajisüaka iba kibong yagi kecha telangzüba magütsüba sülen Lohan yagi tetsürla dak asalaoktsü tenzük. Tetsür la yagi tanurtem la den meyokba atema la tezüdanga liasü saka par kibong yagi Lohan-i jembiba oshi ya angateter asü mangateterar mejangja.
“Nai parnok ya atem nung metoktsütsüla. Nai meranga inyaka tanurtem jenjang tajungba nung toktsütsüla,” ta Lohan-i tetsürla dak asaloktsüba video nung nguogo.
Iba sülen par kibong ya nokdaker Lohan toktsür jaja oadoker, saka lai maneni parnok sülen anidaker aser lai parnoki tanur traffick asür ta aitsür.
“Kü gari ilenji mali nenok mashileni aoer, arung,” ta Lohan-i tanurtem dang ashir saka parnok maneni tsürapur sülen anidaka aoer. “Parnoki tanur traffick asür. Ni nenoka ya shirnokar jangjaogo ni nenok anri mao tashi metoktsütsü,” ta lai ashi.
Iba sülen Lohan-i tanur ka menepa aoer aser tanursang teka nung amtsü merangba mapang tetsü yagi meyiper la tejak nung tsüngoktsür.
Tetsürla yagi Lohan tejak nung atsüngba sülen lai camera la tejak leni meyiper aser teka külen agi la tejak nembanger ni tanurtem kümzüktsü merangerba dang liasü ta ashir.
Kasa mapang nung Lohan den sendaktepa aliba osang ka ajanga ashiba agi lar medemertemi la US-i meyipa anir aotsü asoshi takok tashi merangdar.