Linük 150-i India nunger kaketzülurtem pusemer

Washington, October 18 (Agencies): Linük 150 nungi kaketzülurtemi, tawa India linük nung minority anema inyakba kaketzülurtem dak ozüng alema inyakba anema lungkak aita India nunger kaketzülurtemi parnoki anguba award meyipa agütsüba nungita pusemba den külemi BJP sorkar dang nüburtem kümzüka alitsü aser nüburtemi pei tebilemba sadoka jembitettsüsa inyaktsüla, ta shiogo.
Alima nung kaketzülubaren jenjang ajungkettsü aser pei tebilemba sadoka jembitettsü asoshi noktaker kaketzülurtem tentet tulutiba, PEN International-i sangdong ka ajanga, India sorkari M M Kalburgi, Narendra Dabholkar aser Govind Pansare nunger tepsetertem bushia aputsüla, ta shiogo.
PEN International Tir, John Ralston Saul-i shidi ka ajanga India Tir, Ato kilonser aser Sahitya Akedemi tentet dang, kaketzülurtem aser artist tem densema nisung ajak temeten kümzüka ayutsü asoshi tekaraba nung mera agitsüla, ta ajungshiogo.
“Akademi nem award meyipa agütsür novel zülur, shisashir, sangro zülur aser mongintem parnok 60 dak tema onoki pusemer aser parnok tasü aitbaji nükshir,” ta John-i züluba shidi nungji shia lir.
“Linük 150 nungi 81buba Congress of PEN International Writers nung adentsü asoshi Canada, Quebec City nung adenshir ajaki shisashir aser kaketzülur, M M Kalburgi tepsetba sülen tatalokbatem atema tebilemtsü katsür,” ta John-isa ashi.
“PEN International nung Tir ka ama parnoki kü dang nenok dang, India sorkari India loktiliba aser sobaliba nung kaketzülur aser artist densema nisung ajak temeten kümzüka ayutsü aser India Temzüng tezüluba nung aliba ama atangji nung benoktsü asoshi tekaraba nung mera agiang ta ashitsü mepishir,” ta paisa sangdong nung shia lir.
“Iba dak alia M M Kalburgi, Narendra Dabholkar aser Govind Pansare nunger tepsetba bushisüngdanga parnok tepsetertem temzüng küboki anir arutsü asoshi inyaktsüla,” ta John-i ashi.
Kalburgi ya India nung literary award tematiba, Sahitya Akademi Award agizüker ka lir, aser pa tepsetba sülen Akademi züngsem aikati lungkak aita award meyipjaka Academi-i ola madoker, ta PEN International sangdong nungsa shia lir.