Linük 34 teloktep Islamic teloki kiralongrar anema raratsü: Salman

Riyadh, December 15 (Agencies): Kiralongrar teloktem den raratsü nükjidong nung linük 34 nungi teloktep Islamic mitkar telok tasen ka tentetba osang ka Saudi Arabia-i tanü Mongolbar nü metetdaktsüogo.
Tan tentetba teloktep mitkar teloki Riyadh tesepti ama amshia, alima tesem ajunga nung kiralongrartem den raratsü renemba osang ka Saudi sorkari ketdang asüba Saudi Press Agency-i metetdaktsü.
“Kiralongrabaren ya meimchir temeten anema inyakba tesembatsü maparen lir. Alima ajungai ochimashi aser kiralongrabaren khen yongi magizüker aser kasaji tan asensa tentetba teloktep Islamic mitkar teloki anemtsü,” ta Saudi Deputy Crown Prince & Defencce Minister, Mohammed bin Salman-i sangoktsü.
Tan tentetba teloktep mitkartemi kiralongrar telok ka dang masü saka alima tesem balala nung kiralongratsüren inyaker ajunga anema raratsü renemba osang ka Salman-i ashi.
“Alima linük balalai kiralongrar den sentakba timtem aser khuret tulu tang benoka lir. Syria aser Iraq nati Islamic State (IS) telok den sentakba timtem khuret benoka lir. Ano, Sinai, Yemen, Libya, Mali, Nigeria, Pakistan aser Afghanistan nunger nunga kiralongrar telok balalai lendong tesashi adokdakja tensa mejungi kümdaktsüba kuli ngua lir. Anungji, kiralongrartem meshimeshia samatsütsü nükjidong nung tan teloktep mitkar telok tasen ya tentetogo,” ta pai shisem.
Tan tentetba teloktep mitkar telok nung Jordan, Bahrain, Turkey, United Arab Emirates, Tunisia, Lebanon, Libya, Egypt, Pakistan, Bangladesh, Malaysia, Sudan, Somalia, Mali aser Nigeria nunger nungi mitkartem densemba osang jangjaogo.