Linük amokmeren ajak nungi kümzüka ayutsü: GPRN

Dimapur, February 25 (TYO): Telunglen aser temalen naprongla nungi amokmerenba nungi linük kümzüka ayutsüji sorkar teinyaktsü lir; sorkar ajak atema mapatong aser telatetba nung linük security ji tongtibang, ta tanü Government of the People’s Republic of Nagalim (GPRN) MIP sangdong ka ajanga metetdaktsü.
Yamaji GPRN-ia Naga linükji telunglen aser temalen naprongla nungi amokmerenba nungi teti kümzüka ayutsü atema inyaktsü, ta sangdong nung shia lir.
Osang ajanga angazükba agi, taoba mapang Naga Army Sergeant ka tenüng agi, Benedict Daniel-i linük anema rara ayongtsü atema linük anemba mapatem inyaker. Anungji ibaji bushisüngdangtsü aser par ki, Maram mita reprangtsü atema February 23, 2017 nikongdang telok ka par kidangi yok.
Benedict-i jena otet, ajisüaka bushisüngdangba teloki par kidang nungi AK series rifle ka aser .22 rifles ana den injang ngutet. Aser ibaji ajanga paji ‘mercenary’ ka mesüra nija army ka tentettsü atema inyakba lir ta kuli angur, ta sangdong ajangasa metetdaktsü.
Iba tatalokba sülen Tadubi Constituency nungi BJP candidate, Francis Ngajokpa pusemertemi linük tenzüker trok ki, parnok kinungtsürtem aser tanurtemi repranga lia raksatsübaji sashia aitsür aser ibaji linük anema raksatsüba ama agir, ta GPRN sangdong ajangasa metetdaktsü.
Iba sangdong ya, Benedict Daniel-i ghonda 24 tsüngda regional ketdangsertem dangi arua pai aibelena maliba kuli sayuttsüla mesüra pa nem tai tongloktsütsü atema lir, ta sangdong nungsa metetdaktsü.
GPRN-isa jenshia senzür ka mejenokdaktsütsüla ta ajak dang sangdonger, iba ozüng nung aibelenra Naga nunger nem telangzüba agutsütsü, ta sangdong ajangasa metetdaktsüogo.