Linük anema kodanga meinyak : Tarun Gogoi

Guwahati, September 20 (Agencies) : Pai kodanga linük tebilembatem anema meinyak aser iba nung ajemdaker dang inyaksangshir ta Assam Chief Minister, Tarun Gogoi-i ashi.
ULFA commander-in-chief Paresh Baruah-i pa tetsü semdangtsü atema Gogoi-i maongka agütsübaji linük anema lir, ta Union Minister of State for Home Kiren Rijiju-i aitsüba olen nung ajemdaker Gogoi-i iba osang metetdaktsü.
“Ni linük teinyaktsütem meteta lir aser iba nung ajemdaker ni shiranga aliba tetsü kati lar jabaso den ajuruteptsü atema dang maongka agütsü” ta Gogoi-i osangbenertem dang ashi.
“Ni linük anema noktakertem den rarayonga arur aser item teloktem azüoktsü atema takok ngua inyaktetogo. Linük teinyaktsütem aser kümzüka ayutsübaji ni angateta lir aser ibaji kü atema kanga tongtipang. Iba asoshi kü nem tesayuba agütsütsü nüngdak madoker” ta paisa shisem.
Paresh Baruah-i pa tetsü den ajurutepnüra sorkari humanitarian ground nung ibaji agizüktsü akok saka iba ya Baruah nem talenba kecha melii temelaba agütsür ama mangatettsüla, ta Assam chief minister-isa ashi.