Linük asoshi NE ajungkettsü tenüngdaktsü lir: Rajnath

Itanagar, February 21 (Agencies): Centre nung sorkari northeast ajungkettsü asoshi kanga temolung agütsüdar, “linük senotsü ren nung tali ajungkettsü asoshi NE ajungkettsüji kanga tongtibang,” ta Union Home Minister Rajnath Singh-i ashi.
31buba Arunachal Pradesh Statehood Day, Indira Gandhi Park nung amungba mapang o jembidang, northeast tesemtem koba nung Arunachal densema, taoba mapang sorkari temolung magütsüba ajanga linük nüjiso ngur küm 60buba nunga tanga tesemtem den meneptepa merenloktet, ta pai ashi.
Taoba mapang Atal Bihari Vajpayee-i aniba NDA sorkari NE tesemtem atema Development of North Eastern Region (DoNER) tenüng nung ministry balaka tenteta yutsü, iba sülen item tesemtem terenlokba lenmang balakati ani. Taoba mapang ‘Look East policy’ ta aliba tang sorkari ‘Act East policy’ ta melenshir, iba state tem nung terenlok kara kara bener arutsü asoshi inyakdar, ta paisa ashi.
India arrtsü nung aliba Arunachal Pradesh ajungketa yanglushitsü asoshi centre-i kanga temolung agütsüba Home Minister-i shisem, aser parnok tesem ajak nung renlokdaktsütsü asoshi nüngdakba teyari ajak agütsütsü tenangzükba agütsü.
Arunachal Pradesh litsü nung India aser China na mapang talangka arrtsü atema mangatettep aliba tawa tajungba angatettepa arudar, aser US dollar billion 70 alang shishilemba tenzükogo.
Union Minister-i ano tawa tasen yangluba Arunachal, East Siang district, Pasighat nung Advanced Landing Ground (ALG) nungi civil flight tem yakta mapa inyak tenzüktsüba pai sangdong.
Union Minister of State for Home Kiren Rijiju-i Arunachal Pradesh terenlok asoshi ajak longjemtsü asoshi ayongzük. Pai maneni iba nükjidong tongtettsü asoshi lokti nung tamangba yimsü, kin aser tulur tilar tsüngda kecha tebendang malitsüla, yamala tebendang adokdaktsütsü merangra Arunachal tejakleni maotsü, ta shisem.
Chief Minister Pema Khandu-i pa o jembidang, Arunachal nung ali nungi adokba rongsen jenti liaka, taoba kümtem nung sentong tajung meyanglutetba ajanga item rongsentem sen mekümdaktsütetba shisem. Maneni pai central scheme balala khenyongi ochishia amshitsü ta nangzük.