Linük atema army renema lir: Dalbir Singh

New Delhi, Jan. 13 (Agencies): Union Defence minister Manohar Parrikar-i, kiralongrar teloktem aser nijatemi India yirutsübaji meyiptsütsü nüngdak ta jembiba sülen anogo ana lir Bodhbar nü Army chief, Dalbir Singh Suhag-i, Indian Army nem lemzüktsüba mapa ajak koktettsüsa army renema dang lir, ta ashi.
Pakistan occupied Kashmir (PoK) nung aliba kiralongrar teseptem amaktsüsa army dak tashi lir ma, ta asüngdangba langzüdang Singh-i, “Indian Army nem lemzüktsüba mapa ajak koktettsüsa army renema dang lir,” ta langzü.
Linük anema tayongzükba ajak koktettsüsa army kanga junga renema lir, ta paisa ashi.
Army tongti-i ashiba agi, tang linük security tensaji kanga tebenja aser tesashi kümogo aser tamalen PoK nung kiralongrartem training camp 42 aliba nungi tang tajemba agi training camp 17 lir.
Defence minister Parrikar-i, kiralongrar teloktemi India yirutsüba anema iba meyiptsütsü nüngdak ta jembiba dak sentakba nung tasüngdangba kabo pai langzütsü memulung.
Army Day jakdang pa indang ‘annual press conference’ nung jembidang pai Punjab nung Pakistan den arrtsülen nungi telungpurtem telungi aitba tebilemtsü lemsatepa liasü, ajisüaka iba khuretji iba tesem anüker BSF sepaitemi abentsüla, ta ashi.