Linük atema University of Madras ya model ka lir: Kovind

Monupii/May 05, 2018 nü Chennai nung University of Madras Post-Centenary Diamond Jubilee 160buba Convocation nung linük Tir, Ram Nath Kovind-i certificates agutsüba noksa nung angur. 

Chennai, Monupii/May 05 (Agencies): Tanü linük Tir, Ram Nath Kovind-i, University of Madras ya linük atema tatishitsü tajung ka lir, ta tenüngsang agüja metetdaktsü.
Tanü Chennai nung University of Madras Post-Centenary Diamond Jubilee 160buba Convocation nung jembidang Tir, Kovind-i, “Asen linüki fourth industrial revolution- robotics, genomics aser artificial intelligence maongka agitsü aser tayongzükbatem koktettsü meranger,” ta metetdaktsü.
“21buba putu nung lenmang bushitsü aser lenirtem akumtsü atema asenoki item ama rejutem bushir. India atema iba ya tongtibang tensa ka lir,” ta pai ashi. Iba reju (University of Madras) nung taoba mapang Tir trok tashi züngogo, iba University ama reju shingaia nüma metangtettsü, ta pai ashi.
“Rashtrapati Bhavan nung temaba office menden (Tir) nung mamendang S Radhakrishnan, V V Giri, Neelam Sanjeeva Reddy, R Venkataraman, K R Narayanan aser A P J Abdul Kalam nunger ajak iba reju nung azüng,” ta Kovind-i ashi. Mezüngbuba governor-general, C Rajagopalachari-a iba reju nung azüng, ta paisa shisem.
Science, medicine, engineering aser manufacturing tsütsü research aser innovation nung Tammil Nadu sobaliba tajung lir, ta shia pai, “Iba state ya IT sector ka aser digital economy ainba state ka ta züngshir,” ta metetdaktsü.
University of Madras-i maneni iba dang nungi temaba jenjang atongtsü merangtsüla, ta shia Tiri, iba university-i alima nung reju tajungtibatem den tokteptsüla aser maneni kaketshir aser tesayur tajungtibatem aliba reju asütsü atema tetoktepba shisatsü alitsüla, ta ayongzük.
Tirisa graduates aser parnok tsüraburtem dang New Delhi-i arua Rashtrapati Bhavan semdangtsü jaoka liasü. Tesülen Kovind leniba nung Chennai nung aliba Guru Nanak College nung graduation day among aser Guru Amar Das block den Shaheed Baba Deep Singh auditorium semzükja liasü.