Linük longjemtsü atema tiyongtsüji NE lir: Vinay Sahasrabuddhe

Kohima, June 04 (Agencies): BJP-i aniba Centre sorkar tangatetba nung linük longjemtsü atema tiyongtsüji North East lir ta shia Hokolbar nikongdang BJP National tatong Tir, Vinay Sahasrabuddhe-i, Northeast tesem nung terenlok mapa inyaktsüji sorkar atema tongtibangtiba onüktem rongnung dena lir, ta metetdaktsü.
BJP lenirisa, “North East longjemtsü atema meranga inyakdar, iba tesem nüburtemi koba tashi ka külem ola ka ser jembidir, iba den kasa tesem nung terenlok agütsütsü, aser ibaji sorkar teinyaktsü tongtibang rongnung ka lir,” ta metetdaktsü.
Raj Bhavan, Kohima nung osangbenertem den jembidang Vinay-i, “North east nung terenlok atemaji temaba jenjang nung bangdak lenirtemi meratemji süoki ia agitsüla, ibayongji tesüiba küm 40 tsüngda tang mezüng tawa Ato kilonser, Narendra Modi-i pa mendenbuba ser North Eastern Council (NEC) senden amen,” ta ashi.
Congress-i aniba UPA sorkari Union DoNER Ministry (Ministry Of Development Of North Eastern Region) senzüka toktsü, iba yongji iba ministry ya mapa meinyakba ‘Tasü Ministry’ ka aküm, ta  Vinay-i aitsü.
“Ato kilonseri DoNER ministry asentenshidaktsüogo aser NE nüburtem kishizüng tashi nung terenlok agütsütsü atema pai Minister in Charge ka shim,” ta pai metetdaktsü.
BJP tatong Tir Vinay Sahasrabuddhe-isa, BJP-i aniba NDA sorkari ochimashi ken o kecha makai merükmerüka inyaktsü, ta ashi.