Linük naklu ken matenba madrasa tem National Security Act kübok aitsütsü

Lucknow, August 16 (Agencies): Uttar Pradesh sorkari Independence Day nü madrasa ajak nung India linük wako salatsü aser linük naklu ken atentsü tetuyuba agüja liasü aser tang sorkari iba tetuyuba sülen manidakertem merenshitsü atema osang metetdaktsüogo.

Uttar Pradesh sorkari sangdong ka ajanga state nung aliba madrasa ajak dangi iba osang yok. Independence Day nung madrasa tem dang sobaliba sentongtem agitsü tetuyuba agütsübaji tang mezüng lir.

Osang angazükba agi, Uttar Pradesh kübok madrasa aikati kanga dang odia sorkar tetuyuba magizük aser linük naklu ken maten. Parnokisa Independence Day benjung videograph asütsü teyuba ama meinyak.

“Independence Day nung linük naklu ken matenba aser sentong video-record masüba madrassa tem dak ozüng tapet agi merenshitsü” ta Bareilly Divisional Commissioner PV Jagmohan-i osangbener dang ashi.

“Linük naklu ken matenba Madrasa tem bushisüngdangtsü aser National Security Act (India) kübok aitsütsü” ta Jagmohan-isa shisem.