Linük nüchiso atema raradang RSS/BJP lenirtem kidang aliba azü-a masü: Kharge

Mumbai, Mongputeni/October 05 (Agencies): Congress Party Tir, Rahul Gandhi-i temeim agi raratsüla, ta jembia aruaka party lenir, Mallikarjun Kharge-i “azü” tetshia Rashtriya Swayamsevak Sangh (RSS) aitsüogo.
Tanü Maharashtra kübok Jalgaon district nung lokti senden ka nung jembidang Congress Party lenir, Mallikarjun Kharge-i, India nunger nüchiso atema raraba mapang nung RSS aser BJP lenirtem kidang aliba azü-a ka danga masü, ta aitsü.
Congress party indang Jan Sangharsh Yatra tanabuba shilem Faizpur nung tenzükba sentong nung jembidang All India Congress Committee general secretary, Kharge-i, “Onoki (Congress) linük atema taküm agutsü aser tenla aika agutsüogo. Linük longjema alitsü atema Indira Gandhi-i la taküm tenla agutsü. Rajiv Gandhi-i linük atema taküm tenla agutsü. Kü dang ya langzüang, linük nüchiso atema raradang BJP, RSS lenirtem kidang nungi azü-a ka danga asü asü?,” ta asüngdang.
Küm ka tejaklen Lok Sabha senden nung Kharge-i kasa olen ka jembiba atema Ato kilonser, Narendra Modi-i pa aija liasü.
Yaküm Tsüklai ita Lok Sabha nung Kharge-i, “Gandhi, Indira nunger ama nisungtemi linük telongjem atema taküm tenla agutsü, nenok tsütsü nungia shirnok ali? Azü-a maliasü,” ta jembia liasü.
Tesülen Ato kilonseri, “Congress-i kodanga linük nüchiso atema rarar Bhagat Singh aser Chandra Shekhar Azad ama metetshir. Parnoki kibong kati dang asenok nem nüchiso agutsü ama bilemer,” ta aija liasü.
Jan Sangharsh Yatra dak sendakba nung Congress lenirtemi Maharashtra state tesem balala sema jajar, aser ita asem tsüngda parnoki Assembly menden 150 shi ayimjemtsü. Mezüngbuba shilem Rongjui/September 8 nü tembanga liasü aser tanabuba shilemji Mongputeni/October 9 nü tembangtsü.