Linük nung anogoshia aluyimer 52 soseta asür: Hannan

Agartala, November 12 (Agencies): Honibarnü All India Kishan Sabha General Secretary, Hannan Mollah-i, Centre nung BJP-i aniba sorkar kübok linük nung anogoshia aluyimer 52 soseta asür, ta metetdaktsü.
“Aluyimertem atema Centre sorkar mapatongji aluyimertem anemba lir. Kechiyong parnok nem support price magütsü. Iba ya election mapang BJP-i nangzükba lir. Narendra Modi Ato kilonser inyakba kübok aluyimertem soseta asüba shilem 26 agi teimba kümogo. Anogoshia linük nung aluyimer 52 soseta asür,” ta paisa ashi.
Agartala nungi kilometer 25 shi pilar aliba Bishramganj nung Tripura unit Kishan Sabha-i ayongba senden ka nung jembidang , Mollah-i, “Aluyimer shilem 41-i tanga maparen agi melenner, kechiyong aluyimba ya takoksa anguba maparen ka kümogo. BJP-i support price shilem 50 nangzüka liasü saka kecha magütsü,” ta metetdaktsü.
Sorkar aija paisa, “Bank temi corporates aser industrialists nem sen aputsür, shirnoki aiben sentsühji maoer, saka sorkari aluyimertem anema inyakba mapatong ajanga aluyimertem nembo sen maputsür,” ta ashi.
Kasa sentong nung Tripura Chief Minister, Manik Sarkar-ia, Centre sorkari capitalists aser takartem atema inyaker, ibayongji sensakertemi ajaklen timtem ajangshir, ta ashi.