Linük nung apu 100 mapang mashie ka nung chireptsü: Nitin Gadkari

New Delhi, August 03 (Agencies): Linük tesem balala nung apu 100 dak tema chireptsüsa lir, ta Brihostibarnü Union transport minister, Nitin Gadkari-i Lok Sabha senden nung metetdaktsü.
Road Transport & Highways Ministry-i linük nung apu lakh 1.6 indang safety audit agiba sülen linük nung apu 100 shibo chireptsüsa lir ta metetdaktsü.
Brihostibarnü Lok Sahba senden nung Question Hour mapang nung Gadhari-i, “Item apu 100 ya mapang mashie ka nung chireptsü, anungji iba atema rongdak süa inyaktsüla,” ta metetdaktsü.
Union minister-isa, linük nung lendong paidoktsü atema yaküm transport ministry-i linük nung apu aser culvert ajak indang osang bendentsü atema project ka tenzüka liasü, ta metetdaktsü.
Gadkari-isa yaküm Maharashtra, Raigad district nung apu ka chirepba indang lepshia jembi. August 2, 2016 nü Mahad anasa Savitri ayong nung British nunger yimsüsüba mapang nung yangluba apu ka chirepba lendong nung bus ana aser nija gari kar ponger ao, aser iba lendong nung nisung 26 asü.
Minister-i ashiba agi, taoba mapang nung kuli balala ajanga sen lakh crore 3.85 jenjang gari lenmang project meinyak, ajisüaka item onük aika bentetogo aser maparen tenzükogo.
Iba dak sendakba nung minister-i, gari lenmang yanglutsü atema maparen metenzüktetbaji ali kiburi sorkar nem ali magütsüba, nijatemi sorkar meyong ali agiba aser tanga kulitem ajanga liasü, ta metetdaktsü.
Gadkari-isa, national highway nung kilometer 50 shia passenger aser trucker atema nüngdakba facilities amenoktsü asoshi transport ministry-i inyakdar, ta metetdaktsü.
Item facilities rongnung gari anena ayudak, chiyungtsü ayokdak aser anisüngzükba takdangtem densema lir, ta Union minister-isa metetdaktsü.