Linük nung Dengue agi nisung 30 süogo

New Delhi, Luroi/August 04 (Agencies): Tzüngluruwa mongpu tenzükba sülen India linük nung dengue tashidak agi nisung 14,000 kongshiogo, aser taküm Chiteni/July 22, 2018 tashi nung nisung 30 süogo, ta tanü sorkar osang ka ajanga metetdaktsü.
Union Health Ministry kübok National Vector Borne Disease Control Programme (NVBDCP)-i ashiba agi, linük nung dengue agi shiranger 14,233 liasü.
Chiteni 22, 2018 anogo tashi nung Kerala nung dengue agi shiranger 2,897 liasü aser state nung iba tashidak agi nisung 21 asü. Karnataka nunga iba tashidak agi shiranger 1,903 liasü, ajisüaka nisung asüba osangbo mali.
2017 küm iba tashidak agi shiranger 1,88,401 liasü aser nisung 325 tashi asü.
Taküm Chiteni ita tashi nung Delhi nung dengue agi shiranger 90 liasü, saka nisung asüba osangbo mali, ta NVBDCP-isa metetdaktsü.
Taküm Rongchii/April 20 nü Union Health Minister, J P Nadda-i Delhi densema state 20 nung Principal secretary tem senden ka ayongzüka iba tashidak anema raratsü atema senden ka ayonga menogo.
Tawa Nadda-i shidi ka ajanga Delhi Chief Minister, Arvind Kejriwal dang dengue tashidak nokdangtsü atema mera agia inyaktsü nüngdak, ta metetdakja liasü.
Dengue tashidak ya Chiteni/July nungi Yimpoksüi/November tsüngda kanga bulua pokteter.