Linük nung mezüngbuba e-court Hyderabad High Court nung lapokogo

Hyderabad, July 17 (Agencies) : India nung mezüngbuba e-court July 17, 2016 nü Hyderabad High Court nung lapokogo. Iba court ya Telangana aser Andhra Pradesh state na sentep high court lir.
Iba e-court lapoktsüba mapang, Supreme Court judge, Justice Madan B. Lokur-i, Telangana aser Andhra Pradesh state na ya linük nung Integrated Criminal Justice System (ICJS) project atema shimtetba mezüng state ana lir, ta metetdaktsü.
State ana ya technology tsütsü kanga renlokba ajanga ICJS amenoktsü lemtet. ICJS ajanga police station, court, jail, obendangba, aser forensic science laboratory tem sentaktepa akümtsü, ta pai shisem.
Justice Lokur ya Supreme Court e-Committee nung tekolakba lir aser pai, Hyderabad High Court nung e-court lapokba atema ni kanga pelar aser iba inyakyim ya July 28, 2016 nü senden ka mena lemtettsü, ta ashi.
“E-court ta tenüng agütsübaji dang masü saka ibai computer ajanga dang shidi mamshi-i ajak inyakba okadak ka asütsü. Iba inyakyim angatettsü mapang tera agia ni kü kapu agi iba technology nung amdangogo. E-court ya ajaki mela mela amshitettsü. Okatsür aser obendanger ajak dang ibai amshitsü atema ni ajungshitsü,” ta pai ashi.
“Taruba hopta ni iba inyakyim ya Supreme Court nunga benoktsü merangtsü. Ibaji takoktsüka süa Supreme Court nung amshitet nungbo konang aser tenüngsang ajak Telangana aser Andhra Pradesh na nem agütsütsü,” ta paisa ashi.
Tanü asüng technology ya akhidang dang nungi kanga agi tajungba kümogo. Obendanger ajaki iba e-court ya mela mela amshitettsü anungji tarutsü nung tesem ajak nung e-court aika akümtsü kü teimla tulu lir, ta pai ashi.
Justice Lokur-isa, chief justice-i temulung bendanga agüja inyakba ajanga küm ishika tsüngda nung iba high court nung temelenshi aser terenlok jenti adokogo, ta ashi.
“Tesüiba küm 3 nungi 4 tsüngda temelenshi kanga adokogo. E-committee-i kanga meranga inyakba ajanga iba temelenshi bener arutetogo,” ta pai shisem.
E-court aliba tajangzükji nüburtem nem obendang tekaraba nung agütsütettsü.
Shidi mamshiba court nung inyaktsü mongin kar shima online data entry nung temulung agütsütsü pai ajungshi.
E-court lapokba sentong nung High court tekolakba Chief Justice Dilip B. Bhosale, high court nung okatsürtem aser ketdangser taintem aika dena liasü.