Linük nung shisaliok ajak Hindu akumtsü: Dina Nath Batra

Chandigarh, November 07 (Agencies): RSS shisalen sayur aser Haryana sorkar school & higher education consultant, Dina Nath Batra-i, state shisaliok nung dang masü saka linük tesem ajak shisaliok Hindu kümdaktsüner, ta ashi.
Mezüngbuba state-level consultative senden nung adentsü atema Batra Hokolbar nü Chandigarh-i oa liasü. Iba senden ya Haryana atema shisaliok tasen mapatong atema o lemtepba senden liasü.
Iba senden nung mendenbuba Chief minister Manohar Lal Khattar leniba nung University balala nungi vice-chancellor tem aser tesayurtem aika dena liasü.
Shiksha Bachao Andolan Samiti tentetsang Batra-isa, taruba küm nungibo class 6 nungi class 12 tashi nung moral education atema Bhagwad Gita (Hindu temeshi kaket) benoktsü, ta ashi.
Paisa, tang aliba school tesayurtemi Hindu scripture sayutsü, ta jangjashitsüogo.
“Kaketshirtem dang Bhagwat Gita tapu ajak nungi shloka ana sayutsü,” ta pai ashi.
2014 December ita nung sorkari school ajak nung Bhagwad Gita benoktsü ta lemtetba sülen nisung aikati state nung shisaliok ajak Hindu kümtsütsü meranger ta anema noktaka liasü. Iba mapang nungjagi tenzüka iba onük ya mapang talangka metetshi-i lia aruogo.
Tesülen osangbenertem den jembidang Batra-i, pai Haryana kija nung inyaker masü ta ashi. “Linük ajunga nung shisaliok Hindu kümtsütsü atema ni inyaker, aser ibaji ni tekaraba nung tembanga inyakner,” ta ashi.
Taoba mapang Batra-i American scholar Wendy Doniger-i züluba kaket, ‘The Hindus: An Alternative History’ anema ken o benokba ajanga mangatettep tulu ka adoka liasü. Iba sülen iba kaket publisher, Penguin India-i kaket ajakji raksatsü lemtet.