Linük nung tesünep atema aremzükteptsüla: Hamid Ansari

Deobarnü National Law School of India University-i PESIT Auditorium nung 25 buba Annual Convocation ayongzüka agidang Tatong Tir Hamid Ansari-i o jembiba angur. Noksa nungsa Chief Justice of India & Chancellor Justice Jagadish Singh Khehar, Governor, Vajubhai Vala, Chief Minister, Siddaramaiah, Minister for Law and Parliamentary Affairs, T.B.Jayachandra nungertem angur. (Bengaluru, August 6)

Bengaluru, August 6 (Agencies): Linük nung nisungtem temeyoktep aliba nung tesünep lidaktsütsü atema asenoki aremzüktsüla aser ibaji linük indang teinyaktsü asütsüla, ta Deobarnü India Tatong Tir, M Hamid Ansari-i ashi.
Loktiliba nung tamangba yimsü aser yimten tangatetbatem tsüngda mepetmesü madoktsü atema aremzükteptsü nüngdaker, ta National Law School of India University 25 buba annual convocation nung Ansari-i o jembidang ashi.
Ajak temeyoktep aliba loktiliba tajung ka yangertsü aser kümdaktsütsü atema aremzüktepba kijaji tamendakdak masü, saka iba den ‘angatetba aser agizükba’ adentsüla, ta paisa shisem.
Swami Vivekananda-i ‘Asenoki tanga tamangba yimsütem aremzükba dang masü saka, parnok tajunglen agi agizüktsüla, kechiyong tamangba yimsü ajakji ochi nung amendaka lir’ ta ashi. Anungji asenoki iba tangatetba sülen anidaktsüla, ta Ansari-isa ashi.
Tanü asenoki tamangba yimsü temeten aser aremzüktepba dena secularism indang tangatetbatem tanaben bener arutsü nüngdaker. Asenoki tamangba yimsü temeten ya ajaklen tsütsü nungi agütsütsüla, ta tatong tir-isa ayogzük.