Linük nung yangluba interceptor missile ka tendangogo

Balasore (Odisha), March 01 (Agencies): India-i linük nung yangluba supersonic interceptor missile ka Bodhbarnü takok ngua tendangogo, iba interceptor missile ajanga tenemzük nung ayimba tsükchir ballistic missile ajak raksatsütsü akoktsü, ta osang ka ajanga metetdaktsü.
Ita ka tsüngda tang agi tanabenbuba iba missile tendangogo.
Bodhbarnü Defence ketdangser kati, “Tanü tendangba ya flight mode nung interceptor indang parameter balala indang jangjatsü asoshi tendangba liasü, aser tanü low attitude nung tendangogo,” ta metetdaktsü.
Iba interceptor ji Chandipur nung aliba Integrated Test Range (ITR) launch complex 3 nungi Prithvi missile ka nokdanga raksatsütsü asoshi tendang.
Target missile, Prithvi ji tanep 10:10 ako nung Chandipur nungi yok.
Iba sülen minute pezü lir Bay of Bengal, Abdul Kalam Island nung aliba interceptor, Advanced Air Defence (AAD) missile jagi tracking radar ajanga signals agizükba sülen anüng tom nung Prithvi missile ji raksatsütsü atema apusoa liasü, ta ketdangseri ashi.
“Iba mission ji kanga junga tendangogo aser interceptor jagi target missile dakji indangindanga kongshi,” ta Defence Research Development Organisation (DRDO) nung scientist kati ashi.
Interceptor ji metre 7.5 talang single stage solid rocket propelled guided missile liasü, aser iba nungji navigation system, hi-tech computer ka aser electro-mechanical activator ka liasü, ta ketdangserisa ashi.
Interceptor missile nungji mobile launcher, secure data link, independent tracking aser radars liasü, ta ketdangserisa shisem.
Taküm February 11 nüa Odisha tzüyimkümlen ali nungi kilometer 50 tema tur anünglen interceptor missile kati ballistic missile ka nokdanga raksaja iba tetendangba takok ngua liasü.
2016 küm May 15 nüa AAD missile ka takok ngua tendanga liasü.