Linük nütsüng tali arenbaji Muslims ajanga lir: Sakshi

Meerut, January 07 (Agencies): Linük nütsüng yongzük tali arenbaji Muslim nunger ajanga lir, ta BJP lenir, Sakshi Maharaj-i ashi.
Hokolbarnü Meerut nung ‘sant sammelan’ sentong nung jembidang Sakshi-i, “Linük nung nütsüng tali arenbaji kinüngtsü pezü aser tanur 40 alirtem lir. Nütsüng tali ainbaji Hindu nunger ajanga masü,” ta ashi.
“Nütsüng arenba anendaktsünüra iba linük nung ozüng tesashi nüngdak. Party temi tangatetba balala yutsür linük atema telemtetba agitsüla,” ta Unnao nungi BJP MP, Sakshi Maharaj-i ashi.
Pai jembiba oji opposition party aikati aitsüogo, iba den külemi Election Commission-ia Meerut nung district ketdangsertem dang nungi pai jembiba osang meshiogo.
Supreme Court-i jangjajangja, vote angutsü mechi nung shingaia tamangba yimsü tenüng mamshitsüla ta metetdaktsüba mapang ka nung BJP leniri iba o jembiogo.
Iba o aija JD-U lenir, K C Tyagi-i, Supreme Court-i tetuyuba agutsüba sülen tang mezüng aibelener lir, ta aitsü.
“Tawa Supreme Court aser Chief Election Commission-i election atema tetuyubatem agutsüogo, iba nungji tamangba yimsü, oshioben aser kin-kidong tenüng metetshitsü densema lir. Tang mezüng tongti yimtenren party, BJP nungi MP kati aibelener lir. Sakshi Maharaj anema party aser Election Commission-i inyaktsüla,” ta JD-U lenir Tyagi-i ashi.
“Parnoki lokti nung telok kar anema tashishitsü o jembir. Iba ya Model Code of Conduct anema aibelenba ka lir. Aser iba ya ozüng alema inyakba ka lir,” ta paisa ashi.
Congress lenir KC Mittal-ia, Sakshi Maharaj-i jembiba oji tashishitsü lir, kechiyong ibaji tamangba yimsü ka anema lir aser tawa Supreme Court-i obendang agutsüba anema lir,” ta ashi.
“Iba ya Model Code of Conduct anema lir aser Congress-i Election Commission matsüngdang pa anema ken o ka benkoktsü,” ta paisa metetdaktsü.
Iba dak sentakba nung tasüngdangba ka langzüdang BJP lenir aser Union Minister Mukhtar, Abbas Naqvi-i, “Ni pai jembiba oji mangashi, saka onoki ajak kasa züngshir. Linükji temzüng kübok alir. Item ama o mesüra tangatetbaji BJP mesüra sorkari jembiba masü. Item o nungji onok maden,” ta ashi.
Iba dak sentakba nung Maharaj-ia, “India nütsüngji crore 132 shi lir ta dang jembi. India lushi mainer saka asen nütsüng ainer. Iba tebilemtsü ya asenoki nokdangtsüla ta jembi,” ta jangjatsü.