Linük rangben nung power department lungkak aittsü

Lucknow, November 30 (Agencies): Linük nung ‘Power sector national federation’ nung lennirtem Delhi nung Mongulbarnü ajurutepa December 8 nü Electricity (Amendment) Bill, 2014 onük nung ajemdaker lungkak aitsü sentong renema ayutsü.

Iba lungkak nung power department nung inyaker, engineer aser contractor tem ajak shilem agitsü.

Kochi, Kerala nung power ministers’ conference amungdang National Coordination Committee Of Electricity Employees & Engineers (NCCOEEE)-i union Power Minister Piyush Goyal nem iba lungkak aitsü osang metetdaktsüogo, ta All India Power Engineers Federation (AIPEF) nung mendenbuba Shailendra Dubey-i Lucknow nung osangbenertem dang Hombarnü ashi.

Power sector national federation nung lennirtem Mongulbarnü linük yimtiba nung ajurutepa lungkak aitsü sentong renema ayutsü, ta pai ashi.

Kochi nung senden akaba mapang, Goyal-i, nüburtem asoshi center-i iba bill nung temelenshi aika agidar aser tan tsüngküm tatar hoho senden nung olemtep akatsü, ta shiogo, ta Dubey-i ashi.

Power department-i nokdangaka mangai sorkari Lok Sabha nung electricity bill atema olemteptsü benokogo, ta pai ashi.

Kochi, Kerala nung power ministers’ conference amungdang minister-i nangzükba dak sentakba nung NCCOEEE convener, A.B. Bardhan-i yokba shidi hopta ka dak tema süiaka Power minister nungi kecha telangzüba mali, ta pai shisem.

Dubey-i, electricity bill nung temelenshi agiba ajanga company tulu ang ajangzüktsü aser linük nung state shia aliba power department temi matutsü koba ajanga nüburtem akoksatsü, ta ashi.