Linük rongsen kümzüka ayutsü atema ni inyakogo: PM Modi

New Delhi, March 31 (Agencies): ‘Main Bhi Chowkidar’ campaign pusemtsü atema nangzükertem den jembidang tanü Ato kilonser, Narendra Modi-i, linük anitsü atema pa nem khuret nungloktsüba mapang nungi tenzüka pai ochimashirtem dang nungi linük rongsen kümzüka ayutsü atema tajungtiba agi inyakogo, ta metetdaktsü.
Delhi nung ayongzükba sentong nung jembidang Modi-i, “Linük tenzüktsü atema 2014 küm nüburtemi kü nem iba maongka ya agütsü. Khuret tasen agizükba mapang nungi ochimashirtem dang nungi linük rongsen kümzüka ayutsü atema ni kü tajungtiba agi inyakogo,” ta ashi.
“Chowkidar” ya uniform ka agiba mesüra tesem ka dang anükba masü, saka iba ya tanela ka lir. “Ni asoshibo, chowkidar ya Mahatma Gandhi tangatetba nung tamang katetba lir,” ta Ato kilonseri ashi.
Pai ashiba agi, 2019 election sülen linük nübur crore 130-i pa den külemi tenangzükba agitsü.
Pakistan kübok Balakot nung kiralongrartem camp amakba dak sendakba nung tasüngdangba ka langzüdang pai, kiralongrartem camp amakba tenüng tajungji pa masü saka security sepaitemi agitsüla, ta ashi. “Ni asen sepaitem dak tamang kateter, iba yongji ni parnok nem sadema inyakdaktsü,” ta pai ashi.
Iba sentong nung nisung 5000 shi aden aser linük tesem 500 nung video conferencing ajanga nüburtemi iba sentong repranga liasü.
‘Main Bhi Chowkidar’ campaign ya March 16 nü Ato kilonseri tenzüka liasü.