Linük rongsenkettsüng majungba anema Cong-i longkak aittsü

New Delhi, Mongputeni/October 23 (Agencies): Asükwa mongpu Parliament atongtsü lia Congress party-i linük rongsenkettsüng jenjang majungba anema linük tesem ajaklen longkak aittsü sentong yangludar.
Asükwa mongpu Parliament ya November 18, 2019 nungi tenzüktsü.
Tongti opposition party, Congress-i ashiba agi, linük rongsenkettsüng majungba atema Centre anema longkak aittsü atema parnoki tanga opposition party tema ayongdentsü.
Congress-i tanga party tema ayongdener Delhi nungbo longkak sashia aittsü.
Tang tashi nungbo longkak aittsü anogo, mapang aser sentong junga meyanglu, ajisüaka sentong yanglutsü atema party lenirtem nem mapa lemzüktsüogo.
September 12, 2019 nü Congress-i, linük rongsenktettsüng mainba atema parnoki linük tesem ajaklen October 15 nungi October 25 tashi longkak aittsü, ta sangdonga liasü, ajisüaka benjung aika aliba den Maharashtra aser Haryana na nung assembly elections aliba ajanga thinena liasü.
Tanü osangbenertem den jembidang party lenir kati, longkak aittsü atema sentongji state units ajak nem metetdaktsütsü, ta ashi.
Linük rongsenkettsüng majungba ya Ato kilonser Narendra Modi-i aniba sorkar mapatong tai ajanga lir, ajisüaka sorkari iba atemaji mejembiner, ta Congress-i aitsüogo.
Kasa onük nung Congress lenir, Rahul Gandhi aser taoba mapang Ato kilonser, Manmohan Singh natibo mapangshia Centre sorkar aija arudar.
Tawa Maharashtra aser Haryana assembly elections atema nüboyimba mapang nunga Congress-i iba onük ya tongtibang onük ka kümdaktsü.
Exit polls balala ajanga state anaprong nung BJP-i takok ngua sorkar akümtsü ta asadangtetogo.
Congress-isa parnoki Parliament aser moapu ajak nung iba onük atema ola adoktsü, ta metetdaktsüogo.
Taruba Parliament senden November 18 nungi tenzüktsü aser December 13 tashi amentsü sentong lir.