Linük rongsenkettsüng shilem 7 dak timba aintsü: Shaktikanta

New Delhi, February 04 (Agencies): Tanü Economic Affairs Secretary, Shaktikanta Das-i temelung alemba o jembia, taruba küm ka nung linük rongsenkettsüng shilem 7 dak timba aintsü, ta metetdaktsü.
“Taküm küm GDP aintsü atema asenoki March ita tembang tashi atatsüla. Ajisüaka sangkümbo shilem 7 dak timba aintsü,” ta pai ashi.
Union Finance Minister, Arun Jaitley-i sangdongba den kasa Economic Secretary, Shaktikanta-ia, demonetisation ajanga mapang tatsüka rongsenkettsüng nung kongshitsü, ajisüaka sangkümbo iba jagi mekongshitsü, ta ashi.
Paisa, rongsenkettsüng tulubaka digital transactions dangi meyipdar, ta ashi.
Alima rongsenkettsüng jenjang aluaka India nunger rongsenkettsüngbo tashi itta dang lir, ta Shaktikanta-isa ashi.
“Iba ya marakzüi liasü, marakzüba dang masü saka junga lir. Iba ya aintsü atema onoki inyaktsü,” ta paisa metetdaktsü.
Sorkari Union Budget nung benokba mapatongtem metetdakja pai, tesem ajungkettsüba ajanga aluyimertem ajangzüktsü, ta ashi.
Paisa, contract farming aser UGC ajanga temelenshi tulu adoktsü, ta ashi.