Linük tarutsüji lanurtem dak keta lir: Union Minister Mahesh

September 14, 2017 nü Dimapur nung ‘Sankalp se Siddhi’ sentong nung Nagaland Angh, PB Acharya-i ketdangsüa ‘New India’ tenangzükba agidaktsüba noksa nung angur. Kasa noksa nung Angh kinungtsü aser Union Minister of state (Independent charge), Culture, Mahesh Sharma nata angur. 

Dimapur, September 14 (TYO): Union Minister of State (Independent charge), Culture, Mahesh Sharma-i, linük aintsü aser linük tarutsüji iba linük nütsüng shilem 65- lanurtem dak keta lir, ta metetdaktsü.
Dimapur nung ‘Sankalp se Siddhi’ sentong nung jembidang Union Minister, Mahesh-i lanurtem aser stakeholders dang 2022 küm tashi nungbo India tasen ka yangertsü atema longjemer inyaktsü ayongzük.
New India movement 2017-2022 nükjidong ya India nung ochimashi malitsü, sensak tia malitsü, kiralongra aser communalism malitsü atema lir, ta shia pai ajak dang India tasen ka yangertsü atema Ato kilonser, Narendra Modi nükjidong atalokdakjang, ta ayongzük.
“India nunger sobaliba tajung ajanga Ato kilonser leniba nung inyakba ‘Sankalp Se Siddhi’ mapatong ya takok angutsü,” ta paisa ashi.
Sentong nungsa Nagaland aser Arunachal Pradesh Angh, P.B. Acharya-i ketdangsüa shilem agirtem nem ‘New India’ tenangzükba agidakja liasü.
Nikongdang sentong nung Northeast state balala nungi Zonal cultural centre temi sobaliba shilem agia liasü. Exhibition den sobaliba sentongji Ministry of Parliamentary Affairs-i ONGC Ltd den külemi senteper ayongzüka liasü.