Linük tatong Tir election August 5, 2017 nü agitsü: CEC

New Delhi, June 29 (Agencies): Brihostibarnü Election Commission of India (ECI)-i linük tatong Tir menden atema election agitsü anogotem sangdongogo.
Iba election dak sendakba nung tanü CEC, Nasim Zaidi-i, ”Tenüng agütsütsü atema tatembangbuba anogoji July 18 nü asütsü aser election ji August 5 nü agitsü,” ta metetdaktsü.
Osangbenertem senden nung paisa, ”Election osangjia August 5 nüsa sangdongtsü,” ta metetdaktsü.
Centre den jembitepba sülen Tatong Tir election nung Returning Officer atema EC-i Shamsher Sharif (Rajya Sabha Secretary General) shimogo.
Tang teinyakdak tatong Tir, Hamid Ansari-i iba menden kümsük anabenren tashi benogo aser August 10 nü pai iba menden toktsütsü.
Electoral college-i tatong Tir shimtsü aser iba college nung Rajya Sabha aser Lok Sabha na nungi züngsem 790 lir, ajisüaka item rongnung menden karbo tazüng lir. Iba dak sendakba nung EC-i Goa nungi Rajya Sabha menden tazüng ka atema election agitsü sandongtsü.
Congress lenir Shantaram Naik July 28 nü anisüngzüktsü aser iba menden atema election ji July 21 nü agitsü.