Linük temaba jenjang tasen kati anitsü: PM Modi

August 15, 2015 nü Ato kilonser, Narendra Modi-i New Delhi, Red Fort nung 69 buba Independence Day onük jembidang agiba noksa angur.

New Delhi, August 15 (Agencies): Tanü New Delhi nung 69 buba Independence Day benjungmung sentong nung jembidang Ato kilonser Narendra Modi-i ochimashiba mesen tepsettsü aser black money ken o asoshi inyaktsü nangzükba den külemi India nunger crore 125, “Team India”-i linük temaba jenjang kati anitsü, ta ashi.
Küm noklangzüng 17 buba mapang yangluba, Red Fort nungi linük nüburtem den jembidang Modi-i, par sorkari India tasen ka yangertsü aser anogo 10,000 tsüngda yimtsüng 18,500 nung light angutsü, ta ashi.
Modi-i ashiba agi, yaküm May ita nung BJP-i aniba sorkar tashii aruba sülen takok tulutiba angubaji “Swachh Bharat” campaign lir.
Ex-service personnel asoshi One-Rank-One-Pension scheme mesangdongba atema sasa bilemer, saka sorkari iba scheme indang onüktem agizüker, ta Ato kilonseri ashi.
OROP dak sentakba nung pai, One-Rank-One-Pension scheme ya tajungba nung latettsü imlar, taoba sorkar temia OROP mapa küma inyaktsü atema nangzüka liasü saka parnokia kecha meinyaktet, ta metetdaktsü.
Modi-i bendang linük aika sema senzüogo, ajisüaka tang mezüng Independence Day sentong nung Ato kilonser kati foreign policy onükbo süoka mejembisangji pa lir.
Linük nung ochimashi malitsü asoshi inyaktsü, saka iba asoshiji asenoki ‘temaba nungi tenzüktsüla,” ta pai ashi.
“Iba ya inyaktettsü. Shibu-i achiba ama ochimashi ajanga asen linük achir. Nai shibutemji tepsetnüra tesem ajak nung mozü ajem tutsütsüla,” ta Modi-i ashi.
Paisa ashiba agi, par sorkar tashii marudang Central Bureau of Investigation (CBI)-i black money ken o 800 bushisüngdanga liasü aser tangbo CBI-i kasa ken o 1,800 bushisüngdangdagi.
Ochimashiba lenmang nungi rongsen bendenertemi pei sasa nangzüka sen crore merirjang aika meyipa agütsüogo, ta paisa ashi.
Modi-i tanü jembiba onük nung linük nüburtem longjemba oren “Team India” aiben amshia liasü.
“Iba Team India, India nunger crore 125. Iba team ajanga asen linük temaba jenjang tasen kati anitsü,” ta pai ashi.
Modi-isa, tamalen bank account malir nisung crore 17 tangbo bank account lir aser sen crore 20,000 enokja süa lir, iba ya Pradhan Mantri Jan Dhan Yojana scheme ajanga lir, ta ashi.
Aluyimertem nüngdak balala peritsütsü asoshi agriculture ministry ya Ministry of Agriculture & Farmer Welfare ta melentsü, ta pai sangdongogo.