Linük Temzüng amokmeren kübok mali: Venkaiah Naidu

New Delhi, November 27 (Agencies): Brihostibar nü opposition party Congress-i linük Temzüng amokmeren kübok lir ta aitsüba sülen tanü Centre sorkari, tanü linük Temzüng nung amokmeren mali, ta ashi.

Parliamentary affairs minister, M Venkaiah Naidu-i, ‘secular’ olongji Constitution Preamble nungsa alitsü, ta ashi.

Lok Sabha senden nung India Temzüng onük nung o lemtepba mapang Naidu-i, “Tanü Temzüng amokmeren kübok mali, Emergency mali, nisung apuba mali (yimtenren nung tsükchitepba ajanga), obendangertem alema inyakba mali. Temzüng tashi itshitsü asoshi asenoki longjemer inyaktsüla,” ta ashi.

Yashi Brihostibar nü Lok Sabha senden nung ‘secularism’ onük nung o lemtetba dak sentakba nung Naidu-i, secularism olongji Preamble (okila) shilem ka lir aser yamajisa alitsü. Ajisüaka ni shinübaji, ibaji (secularism) asenok melungjang nung alitsüla,” ta ashi.

Iba den külemi pai ‘taila secularist tem’ aija, kin aser tamangba yimsü nung ajemdaker politics asayartemi iba dangji secular anemer ta ajar, ta aitsüogo.

“Kin aser tamangba yimsü ajanga nüburtem anisar, aser küm pongu tashi parnoki kecha meinyakteter,” ta pai ashi.

Yashi Congress Party Tir, Sonia Gandhi-i linük nung akhümtsübutep maliba onük nung NDA sorkar aija, Linük Temzüng nung aliba tangatetba tajungtem amokmeren kübok lir aser metetsüngmonga anema inyakteper, ta shia liasü.

Dr B R Ambedkar asoba 125 anogomung atema o lemtepba mapang Sonia-i, “Temzüng nung kodanga tamang makartemi mesüra Temzüng yangluba nung shilem magirtemi tangbo iba atemaji inyaker aser tenüng agitsü meranger. Iba (Temzüng) ya tim-i benoktsü atema tangbo parnok o lemteper. Iba dak asayamenü tuluba kecha malitsü,” ta jembia laisü aser item o nung ajemdaker tanü BJP lenir Naidu-i item o meyiptsüogo.