Linük Temzüng amokmeren tia nung lir: Sonia Gandhi

New Delhi, November 26 (Agencies): Brihostibar nü Congress Party Tir, Sonia Gandhi-i linük nung akhümtsübutep maliba onük nung Ato kilonser, Narendra Modi’er sorkar aitsüba olen ka nung lai, Linük Temzüng nung aliba tangatetba tajungtem amokmeren kübok lir aser metetsüngmonga anema inyaker, ta ashi.

Lok Sabha nung Dr B R Ambedkar asoba 125 anogomung atema o lemtepba mapang BJP aija lai, “Temzüng nung kodanga tamang makatetertem mesüra Temzüng yangluba nung shilem magirtemi tangbo iba nungji tenangzükba agir aser tenüng tajung agitsü meranger. Iba (Temzüng) ya tim-i benoktsü atema tangbo parnok o lemteper. Iba dak asayamenü tuluba mali,” ta ashi.

Tesüiba ita ishika tsüngda tatalokbatemji Temzüng tangatetbatem anema lir ta lai ashi.

“Tanü anogo ya tepela anogo ka lir, ajisüaka tejashi-a lir. Küm aika asenok ajungmesoba tangatetbatem lendong nung lir. Itemji maneni anema inyaker,” ta lai ashi.

Tang mezüng Constitution Day anogomung nung Ambedkar-i jembiba o lepshia Congress lenirisa, “Temzüng kaji komaka jungaka, Temzüng benokertemji nisung tamajungertem süra majungtsü. Aser Temzüngji koma-aka mejungaka Temzüng benokertemji tajung süra, ibaji tajung asütsü,” ta shia treasury bench nungi lungkak aitertem dak lai menürenlokja laisa, “Iba ya nenok aser onok atema lir,” ta shisem.

“Temzüng puti otsü ya kanga tejen aser asenok nüjiso atema raraba den sentaktepa lir, iba yongji iba ya Congress party den sentaktepa lir,” ta lai Hindi oshi agi ashi.

BJP-i Ambedkar’er senmang junga benoktsü merangba mapang ka nung Sonia Gandhi-isa, Temzüng yangluba nung Congress-i shilem agiba atema Ambedkar-i tenüngsang agütsüba bilemteta iba temzüng latetba nung tenüng agitsü Congress temeten lir, ta ashi.